काठमाडौँ : प्रधानमन्त्री कप पुरुष राष्ट्रिय प्रतियोगितामा मधेश प्रदेशले सुदूरपश्चिम प्रदेशलाई ४४ रनले हराएको छ। भैरहवास्थित एक्स्ट्राटेक ओभलमा टस हारेर ब्याटिङ गरेको मधेशले १०२ रन बनाएको थियो।

१०३ को विजयी लक्ष्य पछ्याएको सुदूरपश्चिम २९ ओभरमा ५८ रनमा अलआउट भएको हो। सुदूरका लागि हेमन्त धामीले मात्र दोहोरो अंकमा रन बनाए। उनले ३३ बलमा १ चौका र १ छक्कासहित १९ रन जोडे। अर्जुन विकले ९ रन जोडे।

सुदूरका ५ ब्याटर खाता नै नखोली पेभेलियन फर्किदा सुदूर सस्तैमा समेटिएको हो। मधेशका लागि विशाल पटेलले सर्वाधिक ६ विकेट लिए। उनले ६ ओभरमा २ मेडनसहित १८ रन खर्चिए। प्रदिप पाश्वानले ३ विकेट लिँदा रुपेश सिंहले १ विकेट लिए।

त्यसअघि ब्याटिङ गरेको मधेशका लागि प्रदिप पाश्वाले सर्वाधिक २३ रन बनाउँदै अविजित रहे। उनले ५२ बलमा ३ चौका प्रहार गरे। दिपेश दासले १२, पवन दासले १९ र रुपेश सिंहले १२ रन बनाए। सुदूरपश्चिमका लागि बलिङमा हेमन्त धामी र शेर मल्लले समान ४–४ विकेट लिए। नारायण जोशी र विकाश आग्रीले १–१ विकेट लिए।

यो सुदूरको यस प्रतियोगिताको अन्तिम खेल हो। सुदूरले यस प्रतियोगितामा जम्मा ३ जित मात्रै दर्ता गर्दै प्रतियोगिता सकेको हो। मधेशले भने लिगको अन्तिम खेल बागमती प्रदेशसँग खेल्नेछ।