भारतको हरित ऊर्जाको अग्रणी कम्पनी प्रोजिल ग्रीन इनर्जीसँग मिलेर गोल्यान समूहले आउँदो २४ देखि ३० महिनाभित्र ५ सय मेगावाट बिजुली उत्पादन गर्ने बुधवार एक कार्यक्रमका बीच जानकारी दिइएको छ । बिजुली उत्पादनका लागि गोल्यान समूह र प्रोजिलबीच यसअघि नै सम्झौता भइसकेको छ ।

कार्यक्रममा विद्युत् नियमन आयोगका अध्यक्ष डा. रामप्रसाद धितालले सरकारले नवीकरणीय ऊर्जाका परियोजनाहरूलाई अगाडि बढाउनका लागि विभिन्न नीतिहरू ल्याइरहेको बताए । नियामक निकायको हैसियतले आयोगले पनि नयाँ–नयाँ नीतिहरूमा काम गरिरहेको र यस क्षेत्रलाई थप अगाडि बढाउनका लागि सधैं तत्पर रहेको अध्यक्ष धितालले उल्लेख गरे ।

यस्तै कार्यक्रममा इप्पानका अध्यक्ष गणेश कार्कीले गोल्यान समूहले ५ सय मेगावाट बिजुली उत्पादन गर्ने भन्ने समाचार आउँदा निकै उत्साहित बनेको बताए । बन्दै गरेको विद्युत् विधेयकमा सौर्य ऊर्जाको विषय समेट्नुपर्नेमा उनको जोड छ ।

प्रोजिल ग्रीन इनर्जीका अध्यक्ष शोबित बैजनाथ रायले गोल्यानसँग मिलेर नेपालको नवीकरणीय ऊर्जा यात्रामा ऐतिहासिक कोशेढुङ्गा हासिल गर्न अघि बढिरहेको बताए ।

यस्तै गोल्यान ग्रुपका निर्देशक अक्षय गोल्यानले सूर्यको भविष्य रहेसम्म सौर्य ऊर्जाको भविष्य उज्जवल रहेको भन्दै अब यसतर्फ लाग्नुपर्ने आवश्यकता औँल्याए ।

प्रोजिल इनर्जीले भारतका विभिन्न ठाउँमा सौर्य ऊर्जाबाट २ हजार मेगावाट बिजुली उत्पादन गरिसकेको र १ हजार मेगावाट बिजुली उत्पादनको चरणमा रहेको जनाएको छ ।