-
काठमाण्डाै : आईसीसी एकदिवसीय विश्व कप क्रिकेट छनोटअन्तर्गत समूह ‘बी’ बाट पनि ‘सुपर सिक्स’ मा पुग्ने टोलीको टुङ्गो लागेको छ ।
आज आइतवार भएको खेलमा श्रीलङ्काले आयरल्यान्डलाई १ सय ३३ रनले हराएसँगै समूह ‘बी’ बाट श्रीलङ्का, स्कटल्यान्ड र ओमानले ‘सुपर सिक्स’ मा स्थान बनाएका छन् । समूह ‘ए’ बाट हिजो शनिवार नै वेस्ट इन्डिज, जिम्बावे र नेदरल्यान्ड्स ‘सुपर सिक्स’ मा पुगिसकेका छन् । आजै भएकाे अर्को खेलमा स्कटल्यान्डले ओमानलाई ७६ रनले हराएको छ ।
आजकाे खेलसँगै जिम्बावेमा भइरहेकाे आईसीसी एकदिवसीय विश्व कप छनोटमा ‘प्लेअफ’ खेल्ने चार वटा टोलीको टुङ्गो लागेको छ । समूह ‘ए’ बाट नेपाल र अमेरिका तथा समूह ‘बी’ बाट आयरल्यान्ड र यूएईले प्लेअफ खेल्ने भएका छन् ।
