कास्की : नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल प्रचण्डले देशमा राजनीतिक स्थिरता र आर्थिक विकासको नयाँ युगको सुरुवात यही गठबन्धनबाटै गर्ने सङ्कल्प लिइएको बताएका छन् । सत्तारूढ पाँच दलीय गठबन्धनले आज आइतवार पोखरामा आयोजना गरेको चुनावी सभामा उनले यस्तो बताएका हुन्।

संविधान, लोकतान्त्रिक गणतन्त्र, सङ्घीयता, समानुपातिक समावेशीको रक्षाका लागि गठबन्धनको जन्म भएको उल्लेख गर्दै अध्यक्ष प्रचण्डले गठबन्धन गरेर प्रतिगमन र प्रतिक्रान्तिकारीका विरुद्ध सङ्घर्ष नगरेको भए देश दुर्घटनामा परिसक्ने बताए ।

उनले भने, ‘देशलाई प्रतिगमन र निरङ्कुशताबाट बचाउन नै यो गठबन्धनको जन्म भएको हो ।’ देशका छ महानगर र ११ उपमहानगरमा गठबन्धनका साझा उम्मेदवार छान्न सजिलो नभए पनि सबैले देशको समग्र राजनीतिक स्थितिलाई विचार गरेर नेपालीको भाग्य र भविष्यप्रति इमानदार भएर निर्णय गरिएको उनको भनाई छ ।

अध्यक्ष प्रचण्डले अहिलेको सत्ता गठबन्धन स्थानीय तहको निर्वाचनसम्म मात्र नभएर आउँदो प्रदेश र सङ्घीय चुनावसम्म कायम रहने बताए । उनले गठबन्धन जन्मने दिनदेखि नै टुटाउने र यसलाई अघि बढ्न नदिने प्रयास भएका भन्दै उनले गठबन्धनको निरन्तरतामा जोड दिए ।

उनले भने, ‘राष्ट्र, संविधान र गणतन्त्रको रक्षाका लागि अघि बढेको गठन्धनलाई विभाजित गर्ने षड्यन्त्र भइरहेका छन्, गठबन्धनका शक्तिहरूले धेरै मेहनत र अप्ठ्यारोसँग जुधेर अहिलेको गठबन्धनलाई अघि बढाउनुपर्दछ, पालिका चुनावमा मात्र होइन, भोलि प्रदेश र सङ्घीय चुनावसम्म लैजानु आवश्यक छ ।’

गठबन्धनका साझा उम्मेदवारलाई विजयी गराउन उनले मतदातासमक्ष आग्रह गरे । वैशाख ३० गतेको पालिका चुनावमा पोखरा महानगरमा गठबन्धनबाट नेकपा (एकीकृत समाजवादी) का धनराज आचार्य मेयरको र र नेपाली कांग्रेसका कोपिला रानाभाट उपमेयरको उम्मेदवार रहेका छन् ।