पर्सा । कोरोनाका संक्रमणका कारण पर्साको वीरगन्जमा थप तीन जनाको मृत्यु भएको छ । मृत्यु हुनेमध्ये एक वीरगन्जमा रहेको जगदम्बा इन्टरप्राइजेजका सिइओ रहेका छन् । ६५ वर्षीय उनको नारायणी अस्थायी कोरोना अस्पताल गण्डकमा उपचारको क्रममा बिहीबार राति मृत्यु भएको अस्पतालका इन्चार्ज डा. निरजकुमार सिंहले जानकारी दिएका छन् । उनका अनुसार संक्रमण पुष्टि भएपछि गत साउन ७ गते उनी कोरोना अस्पताल भर्ना भएका थिए । लामो समयदेखि मुटुसम्बन्धी रोगबाट पीडित उनी भारतीय नागरिक हुन् ।

त्यसैगरी अन्य दुई जना मृतक पनि वीरगन्जकै रहेका छन् । मृत्यु हुनेमा एक ७५ वर्षीय वृद्ध छन् उनको घरमै मृत्यु भएको र पछि स्वाब परीक्षण गर्दा नतिजा पोजेटिभ देखिएको डा. सिंहले बताए । त्यस्तै अर्का ३५ वर्षीय पुरुषको पनि नारायणी अस्थायी कोरोना अस्पतालमा उपचारका क्रममा बिहीबार साँझ मृत्यु भएको हो । ज्वरो र श्वासप्रश्वासमा समस्या आएपछि उनलाई आकस्मिक कक्षमा भर्ना गरी स्वाब परीक्षणका लागि पठाइएको थियो । मृत्युपछि बिहीबार राति उनको पीसीआर रिपोर्ट पोजिटिभ आएको डा. सिंहले बताए ।

यीसँगै नेपालमा कोरोनाकै कारण मृत्यु हुनेको संख्या ५५ पुगेको छ ।