काठमाडौं । नेपालमा बुधबार थप ११४ जनामा कोराना भाइरसको संक्रमण पुष्टि भएको छ । एकै दिनमा संक्रमण पुष्टि भएको अहिलेसम्मकै सबैभन्दा ठूलो संख्या हो ।

स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा. विकास देवकोटाले विभिन्न प्रयोगशालामा गरिएको परीक्षणमा अहिलेसम्म कोभिड-१९ पुष्टि भएका व्यक्तिको संख्या ८ सय ८६ पुगेको जानकारी दिएका हुन् ।

उनका अनुसार संक्रमित हुनेमा रौतहटका ३६, झापाका १७, बाँकेका १६, दाङका १५, सप्तरीका ११, बाराका ७, बागलुङका ६, रुकुमका ३, सिरहाका २ र मकवानपुरका १ जना रहेका छन् ।

अहिलेसम्म संक्रमितमध्ये ६९९ जनाको उपचार भइरहेको र १८३ जना निको भएका छन् भने ४ जनाको मृत्यु भएको मन्त्रालयले जनाएको छ ।

मन्त्रालयका प्रवक्ता देवकोटाका अनुसार हालसम्म पीसीआर विधिबाट ५८ हजार २ सय ७७ र आरडीटी विधिबाट एक लाख दुई सय ८७ जनाको नमुना परीक्षण गरिएको छ । बुधबारसम्म क्वारेन्टाइनमा ७० हजार ३ सय ५ जना रहेको बताइएको छ ।