रुपन्देही । रुपन्देहीको शुद्धोधन गाउँपालिका वडा नं १ स्थित सिसैंमा किसानले उत्पादन गरेको करीब तीन लाख बराबरको तरकारी हिजो सडकमा फालेका छन् ।

सैनामैना नगरपालिका र शुद्धोधन गाउँपालिकाको सीमा क्षेत्र कुश्मामा नगरपालिकाले आवतजावत गर्न रोक लगाएपछि आक्रोशित किसानले करीब २० क्वीन्टल विभिन्न तरकारी लुम्बिनी सडकमा फालेको स्थानीयवासी गणेश पासीले जानकारी दिए ।

सो गाउँपालिका वडा नं १ स्थित बेलवा तरकारी उत्पादनको पकेट क्षेत्र मानिन्छ । किसानले बेलवाबाट बेच्नका लागि बुटवल लैजाँदै गरेको तरकारी बाटामा फालेको पासीले बताए ।

किसानले आफूले उत्पादन गरेको बोडी, घिरौँला, तीते करेला, भन्टा, काँक्रालगायत तरकारी सडकमा फालेका थिए । रुपन्देहीको गैडहवा गाउँपालिकालगायत ठाउँमा पनि कोरोना सङ्क्रमित फेला परेपछि सैनामैना र शुद्धोधनको सीमा क्षेत्रमा उच्च सतर्कता अपनाउने सहमतिअनुसार आवतजावत गर्न दिइएको थिएन ।

सैनामैना ४ का वडाध्यक्ष धनबहादुर कार्कीले वडास्तरीय दलीय सहमतिमा आवतजावतमा रोक लगाएको उल्लेख गर्दै शुद्धोधन १ का वडाध्यक्षसँग पनि सहमति भएको बताए । स्थानीय प्रहरी, वडास्तरका राजनीतिक दल, वडाध्यक्षलगायतका स्थानीयवासीको सहमतिमा आवतजावतमा रोक लगाएको बताइएको छ ।

गैडहवा गाउँपालिकामा आवतजावतमा रोक लगाएपछि बेलवाका किसानलाई स्थानीय सूर्यपुरा हुँदै भैरहवा जाने बाटामा पनि अवरोध भएको छ ।स्थानीयवासी दुर्गानिधि पन्तले भने, ‘किसानले उत्पादन गरेको तरकारी बारीमा नै कुहिने अवस्था आएको छ’ ।

विभिन्न गाउँपालिका र नगरपालिकासहित रुपन्देहीमा कोरोना भाइरस सङ्क्रमित सङ्ख्या २८ पुगेका छन् । शुद्धोधन कृषि तथा सहकारीमन्त्री घनश्याम भुसालको निर्वाचन क्षेत्र पनि हो । रासस