काठमाडौँ । कोरोना भाइरस (कोभिड –१९) को सम्भावित जोखिम हुन नदिन लकडाउन भएपछि रगतको अभाव हुन नदिन नेपाल रेडक्रस सोसाइटी काठमाडौ जिल्ला शाखा र महाबौद्ध उपशाखाले संयुक्त रूपमा ‘एक घर एक रक्तदाता’ अभियान जारी राखेका छन् ।

यस अन्तर्गत काठमाडौ महानगरपालिका वडा नं १५ चागल निवासी समाजसेवी राकेश कर्माचार्यको अगुवाईमा शुक्रबार कामपा सो वडाको चागल, लखतीर्थ र धुम्बाखेलका १३ जना स्वयंसेवी रक्तदाताले रगतदान गरेका हुन् ।

“विशेष अवस्थामा रगतको अभाव हुन नदिन सामाजिक सञ्जालमार्फत् रक्तदातालाई आह्वान गरी रक्तदानको कार्यक्रम आयोजना गरेका हौँ । ” स्थानीयवासी रामेश्वरमान कर्माचार्यले भनेका छन् । लकडाउनका अवस्थामा रगतको अभाव हुन नदिन सोसाइटीद्वारा सञ्चालित केन्द्रीय रक्त सञ्चार सेवा केन्द्रले रक्तदाताको पायक पर्ने स्थानमा पुगी सामाजिक दूरी कायम गरी रगत सङ्कलन जारी राखेको छ ।