काठमाडौँ । शहीद स्मारक ‘ए’ डिभिजन लिगअन्तर्गत बिहीबार भएको दोस्रो खेलमा राजेश परियारको दुई गोलको मद्दतमा न्यु रोड टिम विजयी भएको छ । दशरथ रङ्गशालामा भएको सो खेलमा न्यु रोडले ब्रिगेड ब्वाइज क्लबलाई २–० गोलले पराजित गरेको हो ।

पहिलो आफको ३२औँ मिनेटमा राजेशले पहिलो गोल गर्नुभएको हो । यस्तै दोस्रो हाफमा उहाँले नै दोस्रो गोल गर्नुभयो । खेलको ५२औँ मिनेटमा राजेशले व्यक्तिगत दोस्रो गोल गर्नुभएको हो । खेलको ६२औँ मिनेटमा ब्रिगेडले गोल गर्ने अवसर पाए पनि त्यसको सदुपयोग भने गर्न सकेन् । कप्तान अनिल गुरुङले हानेको प्रहार गोलकिपर अजित प्रजापतिले बचाउनुभयो । ब्रिगेडले पेनाल्टीमा समेत गोल गर्न नसकेपछि टोली निराश बनेको थियो । जितसँगै नौ खेलमा १५ अङ्कसहित न्यु रोड लिगको चौथो स्थानमा पुगेको छ । यस्तै ब्रिगेड आठ अङ्कसहित ११औँ स्थानमा छ । रासस