-
मेगा बैंक नेपालले सेवा विस्तारका क्रममा एकै दिन १८ शाखा सञ्चालन गरेको छ । बैंकले देशका ४ नगरपालिका र १४ गाउँपालिकामा स्थापना गरेका शाखाको आइतबार एकै दिन उद्घाटन गरिएको हो ।
बैंकले तनहुँको भानु, रुपन्देहीको सैनामैना, सिराहाको लहान र स्याङ्जाको भिरकोट नगरपालिकामा शाखा सञ्चालन गरेको बैंकले जनाएको छ ।
यसैगरी, शाखा विस्तार भएका १४ गाउँपालिकामा धादिङको त्रिपुरासुन्दरी, गोरखाको भीमसेन, सिन्धुपाल्चोकको हेलम्बु, इन्द्रावती र पाँचपोखरी, सर्लाहीको रामनगर, सिराहाको विष्णुपुर, धनुषाको लक्ष्मीनियाँ, पाँचथरको कुमायक, इलामको रोङ, ओखलढुंगाको खिजिदेम्बा, उदयपुरको रौतामाई, बर्दियाको गेरुवा, प्युठानको ऐरावती रहेका छन् ।
‘हलोदेखि हाइड्रोसम्म’को सेवा पुर्याउने उद्देश्यले बैंकले ग्रामीण भेगमा शाखा विस्तारलाई तीव्रता दिएको छ । ‘ग्रामीण भेगका जनतालाई बैंकिङ सेवा पुर्याउने नेपाल सरकारको योजनाअनुरूप हामीले दूरदराजमा हाम्रा सेवा विस्तार गरिरहेका छौँ,’ मेगा बैंककी सिइओ अनुपमा खुञ्जेलीले भनिन् ।
