काठमाडौं । बैंक तथा वित्तीय संस्थाहरुलाई मितव्ययी बनाउने जिम्मेवारी बोकेको राष्ट्र बैंक आफैंमा भने मितव्ययी हुन नसकेको महालेखा परीक्षकको प्रतिवेदनले देखाएको छ । राष्ट्र बैंककै कर्मचारीको तलबको अनुपातमा २०४ प्रतिशतसम्म भत्ता लिने गरेको पाइएको छ । भत्तामा  २०७१/७२ मा १ अर्ब ४१ करोड १३ लाख खर्च भएको पाइएको छ ।

राष्ट्र बैंकका कर्मचारीले कर्मचारी सञ्चय कोष, औषधि उपचार कोष, उपदान कोष र कर्मचारी सुरक्षा कोष बाहेक १४ किसिमका भत्ता पाउने गरेका छन् । ७ किसिमका भत्ता सबैले र थप ७ किसिमका भत्ता विशेष समूहका कर्मचारीले पाउने गरेका छन् । ‘यस्ता भत्ता र प्रोत्साहनबापतको खर्च, तलवको अनुपातमा २०४ प्रतिशतसम्म हुन आउँछ’ महालेखाले भनेको छ ।

राष्ट्र बैंकको प्रतिवेदन अनुसार बैंक सेवा १ हजार ९७ र प्राविधिकमा १ सय ३२ गरी कुल १ हजार २ सय २९ कर्मचारी छन् । राष्ट्र बैंकले साधारण, प्रशासनिक खर्च र प्रोभिजन शीर्षकमा कुल ७ अर्ब १९ करोड खर्च भएको देखाएको छ । कर्मचारीको भत्ता र प्रात्साहन वापत मात्रै बैंकले कुल प्रशासनिक लगायतको खर्चको १५ प्रतिशत रकम खर्च गरेको देखिन्छ  ।