अस्ट्रेलियाले विदेशी विद्यार्थीलाई अध्ययनका क्रममा श्रीमान–श्रीमती तथा आश्रित सन्तान अस्ट्रेलिया लैजान पाउने सुविधा हटाउने तयारी गरेको छ ।

अस्ट्रेलियाका गृहमन्त्री टोनी बर्कले विदेशी विद्यार्थीका परिवारका सदस्यलाई अस्ट्रेलिया ल्याउन रोक लगाउने व्यवस्था गर्न लागिएको जानकारी दिनुभएको द गार्जियनले जनाएको छ ।

अहिले अन्तर्राष्ट्रिय विद्यार्थीले आफ्नो अध्ययन अवधिमा श्रीमान् वा श्रीमती तथा १८ वर्षमुनिका आश्रित सन्तानलाई अस्ट्रेलिया लैजान पाउने व्यवस्था छ । विद्यार्थीका श्रीमान् वा श्रीमतीले पनि विद्यार्थीले अध्ययन गरिरहेको विषय र तहअनुसार निश्चित समयसम्म अस्ट्रेलियामा काम गर्न पाउने व्यवस्था छ । तर प्रस्तावित नयाँ व्यवस्थाले विद्यार्थीका परिवारका सदस्यलाई अस्ट्रेलिया ल्याउने यो सुविधा हटाउने तयारी गरिएको हो ।

सरकारले विद्यार्थीको संख्या घटाउने योजना नभए पनि उनीहरूका परिवारलाई साथमा ल्याउने सुविधा प्रभावकारी रूपमा बन्द गर्न खोजेको हो । यद्यपि, यो व्यवस्था अहिलेसम्म लागू भइसकेको छैन ।

अस्ट्रेलिया सरकारले समग्र आप्रवासन घटाउने योजनाअन्तर्गत अस्थायी आप्रवासीका लागि लागू हुने नियमसमेत कडा बनाउने तयारी गरेको छ । एउटा अस्थायी भिसा सकिएपछि अर्को प्रकारको भिसा लिएर अस्ट्रेलियामा बसाइ लम्ब्याउने प्रवृत्तिलाई समेत नियन्त्रण गर्ने सरकारको योजना छ ।

पछिल्ला वर्षमा आप्रवासीको संख्या बढ्दा आवास, पूर्वाधार र सार्वजनिक सेवामा दबाब बढेको भन्दै अस्ट्रेलियामा बहस हुँदै आएको छ । बढ्दो आप्रवासनले घरको माग बढाएको र सार्वजनिक सेवा तथा पूर्वाधारमा चाप परेको आलोचना हुँदै आएको छ ।