काठमाडौं । सडक विभागले भोटेकोसी नदीमा आएको बाढीबाट ध्वस्त भएका सडकखण्डको विकल्प सडकहरू सार्वजनिक गरेको छ ।

मंगलबार पत्रकार सम्मेलन गर्दै विभागका महानिर्देशक विजय जैसीले रसुवागढीसम्म पुग्ने ८२ किमि सडकमध्ये ४० किमि पूर्ण रूपमा क्षति भएको उल्लेख गरे । उनले क्षति भएको सडकको वैकल्पिक बाटोहरू तयार गरिरहेको जानकारी दिए ।

गल्छी–बेत्रावती सडकखण्डको ठूलो पुलतर्फको बेत्रावतीदेखि देवीघाटसम्म बाटो खुलाउने कार्य भइरहेको तथा पृथ्वी राजमार्गको गल्छी–बैरेनी–जरीखेत–पोखरे–बांगेखेत–गलौतीखण्ड खुलाउने काम सकिएको उनले बताए ।

बाढीले रसुवासम्म जोड्ने सडकका ३१ वटा पुलहरू बगेको थियो । जसमा विभागले तीनवटा बेलिब्रिज राख्ने काम हिजोबाट सुरु गरेको छ । जैसीका अनुसार, देवीघाटको तादीखोला पुलमा ५० मिटरको बेलिब्रिज हाल्ने तयारी भइरहेको छ भने देवीघाट, त्रिशूली बजार र बेत्रावतीमा पनि काम सुरु भइसकेको छ । अन्य बगेका २० वटा पुलहरूमा सर्भे भइरहेको उनले जानकारी दिए ।

धादिङबेँसीको फुर्केखोला पुल भाँचिएकोमा त्यसको विकल्पका लागि मास्टार भन्ने ठाउँबाट वैकल्पिक बाटो बनाइएको छ भने त्यसमार्फत त्रिशूली बजार पुग्न गल्छीको बाटो प्रयोगमा ल्याइएको छ ।

बेत्रावती–धुन्चे सडक जोड्न विदुरदेखि बेत्रावतीसम्म १० किलोमिटर सडकअन्तर्गत ४ किलोमिटर त्रिशूलीले बगाएको थियो । जसमा ७ किमि बनाइसकेको विभागले जनाएको छ ।

बेत्रावतीमा सडक स्थापना सकिएपछि बेलीब्रिज हालेर सवारी आवतजावत गराउने तयारी भइरहेको महानिर्देशक जैसीले बताए ।

त्यस्तै, काठमाडौंको टोखाबाट धुन्चेसम्म जाने ११० किमिको वैकल्पिक बाटो प्रयोगमा आएको छ । कृष्णभीरतर्फको बाटो पनि खुलाउन छलफल गरिरहेको विभागले जनाएको छ ।

सडक भत्किएसँगै ग्यास तथा तेल अभाव हुन नदिन विभागले तराइबाट ग्यास बुलेट र तेल ल्याउन त्रिभुवन राजपथ र कान्ती लोकपथ प्रयोग गरिएको जनाएको छ ।

बाढीबाट क्षति पुगेका ५३ वटा झोलुंगे पुलमध्ये २० वटा भोलिबाट मर्मत गरिने र ३३ वटा बन्न समय लाग्ने देखिएको विभागले जनाएको छ ।

विभागका अनुसार, पहिलो चरणमा पाँच स्थानमा झोलुंगे पुल मर्मत गरिनेछ । जसमा एउटा विदुर(१ को त्रिशूलीको इन्द्रयणीमा राखिएको छ । त्यस्तै, देवीघाट बेलकोटगढीमा तुइन, बेत्रावतीमा र रसुवाको दुई ठाउँमा झोलुंगे पुल राखिने विभागले जनाएको छ ।

पुननिर्माणमा जानुपर्ने ३३ वटाका लागि भारतबाट लठ्ठा मगाउनुपर्ने भएर केही समय लाग्न सक्ने महानिर्देशक जैसीले बताए ।

सडक विभागले हाल अस्थायी रूपमा सडक सञ्जाल खुलाउन आकस्मिक बैठक बसेर ३ करोड ५० लाख बजेट विनियोजन गरेको र सोबाटै खर्च गर्दै आएको जनाएको छ ।

अन्य आवश्यक रकम योजनाअन्तर्गतको विनियोजित बजेटबाट खर्च गर्न दिन सहमति गरेको जनाएको छ । यसका लागि विभागका ५० जना प्राविधिकहरूले फिल्डमा काम गरिरहेका जानकारी दिइएको छ ।

झोलुंगे पुल मर्मतका लागि १५ करोड बजेट विनियोजन गरेर खर्च गरिरहेको छ भने ४० करोडसम्म लाग्ने अनुमान गरिएको छ । उक्त मर्मतको काम २५ दिनभित्र सकिने विभागको अनुमान छ ।