काठमाडौं : यातायात व्यवस्था कार्यालय पर्साका तत्कालीन अधिकृत कमलराज गौतम भ्रष्टाचारी ठहर भएका छन् । विशेष अदालतले अकुत सम्पत्ति आर्जनसम्बन्धी भ्रष्टाचार मुद्दामा गौतमलाई दोषी ठहर गरेको हो ।

विशेष अदालतका अध्यक्ष सुदर्शनदेव भट्ट तथा सदस्यहरू डिल्लीरत्न श्रेष्ठ र विदुर कोइरालाको इजलासले शुक्रबार (असार ५) गौतमलाई एक करोड आठ लाख एक हजार ८३८ रुपैयाँ विगो असुल गरी त्यति नै जरिबाना र एक वर्ष कैद सजायको फैसला सुनाएको हो ।

अदालतले अपराध पीडित संरक्षण ऐन, २०७५ बमोजिम गौतमबाट चार लाख ३२ हजार ७३ रुपैयाँ पीडित राहत कोषमा जम्मा गराउन समेत आदेश भएको छ । गौतमको सार्वजनिक सेवामा प्रवेश गरेको मिति २०५५ वैशाख ६ गतेदेखि २०७९ चैत २४ गतेसम्मको आय–व्यय विश्लेषण गर्दा भ्रष्टाचार ठहर भएको हो ।

गौतमको कुल वैध आय तीन करोड ४७ लाख ८६ हजार ३८२ रुपैयाँ ३१ पैसा देखिएको छ । कुल व्यय चार करोड ५५ लाख ८८ हजार २२० रुपैयाँ ५५ पैसा रहेको छ । वैध आयभन्दा व्यय बढी देखिएपछि गौतमलाई भ्रष्टाचारमा सजाय तोकिएको हो । अख्तियारले भने वैध आयभन्दा दुई करोड ५१ लाख ७८ हजार ६८७ रुपैयाँ ७१ पैसाबराबरको सम्पत्ति गैरकानुनी रूपमा आर्जन गरेको दाबी अदालतमा लिएको थियो ।

अख्तियारले गैरकानुनी सम्पत्ति आर्जन (अकुत) गरेको उजुरीका आधारमा अनुसन्धान गरेको थियो । अख्तियारले भने साढे दुई करोड रुपैयाँभन्दा बढी स्रोत नखुलेको सम्पत्ति फेला परेको दाबी लिएको थियो ।