काठमाडौं : लगातार तीन दिन घटेको शेयर बजार साताको अन्तिम कारोबार दिन आज सामान्य बढेको छ । शेयर बजार परिसूचक नेप्से आज १ दशमलव ७७ अङ्कले बढेर २ हजार ७३१ दशमलव ९४ विन्दुमा पुगेको छ ।

आज विकास बैंक, लगानी, जीवन बीमा, उत्पादन तथा प्रशोधन, माइक्रोफाइनान्स र म्युचल फन्ड बाहेक अन्य समूहको सूचक सामान्य बढेको छ ।

आज १२७ वटा कम्पनीको शेयर बढेकोमा १२० वटाको घटेको छ । यस्तै २२ वटा कम्पनीको शेयर भने घटबढ भएको छैन ।

आज नबिल बैंकको डिबेन्चर ९२०८९० ७ दशमलव ७१ प्रतिशतले बढेको छ । बजार सामान्य बढेको दिन युनियन हाइड्रोपावरको शेयर सबैभन्दा धेरै १४ दशमलव ७९ प्रतिशतले घटेको छ ।

आज नेप्से बढे पनि कारोबार रकम भने घटेको छ । हिजो ३ अर्ब २९ करोडको कारोबार भएकोमा आज ३३८ वटा कम्पनीका ७९ लाख ३४ हजार कित्ता शेयर ३ अर्ब ९ करोड रुपैयाँमा किनबेच भएको छ ।

झण्डै दुई तिहाईको सरकार बनेयता शेयर बजारले सकरात्मक लय खासै समाउन सकेको छैन । शेयरबजारमा चर्चित खेलाडीदेखि ब्यपारिक घरानासम्म एकपछि अर्को गरेर प्रहरीले समाउन थालेपछि शेयरबजारको माहौल सकरात्मक बन्न नसकेको एकाथरी विश्षेशकको भनाई छ ।