गाजामा शान्ति प्रक्रियाका लागि ट्रम्प प्रशासनले समितिहरू घोषणा गर्न थालेकोप्रति इजरायल र प्यालेस्टिनी दुवैले यसको आलोचना गरेका छन् ।

प्यालेस्टिनी नेता मुस्तफा बर्घौतीले ट्रम्प प्रशासनले घोषणा गरेका समितिहरू केही अन्तर्राष्ट्रिय सदस्यहरूसहितको अमेरिकी बोर्ड जस्तो देखिने टिप्पणी गर्नुभएको बीबीसीले जनाएको छ । यस्तै इजरायलले यीमध्ये एक समिति, गाजा कार्यकारी बोर्डमा नियुक्तिको बारेमा परामर्श नगरिएकोमा आफू दुःखी भएको बताएको खबरमा उल्लेख छ ।

यसैबीच इजरायली प्रधानमन्त्री बेन्जामिन नेतान्याहुले गाजा शान्ति प्रक्रियामा अमेरिकी राष्ट्रपति ट्रम्पको प्यानलमा नियुक्तिहरूको बारेमा छलफल गर्न मन्त्रिपरिषद्को बैठक आयोजना गर्दै छन्।

ट्रम्प प्रशासनको नयाँ शान्ति बोर्डमा नियुक्त हुनेहरूमा ट्रम्पका ज्वाइँ जारेड कुशनर, ट्रम्पका दूत स्टिभ विटकफ, अमेरिकी विदेशमन्त्री मार्को रुबियो र बेलायतका पूर्वप्रधानमन्त्री टोनी ब्लेयर समावेश छन्।

ट्रम्पले अध्यक्षका रूपमा काम गर्ने बोर्ड इजरायल र हमासबीचको युद्ध अन्त्य गर्ने उनको २०–बुँदे योजनाको एक हिस्सा हो । यसले गाजाको सञ्चालनको अस्थायी रूपमा निरीक्षण गर्ने र यसको पुनर्निर्माण व्यवस्थापन गर्ने अपेक्षा छ ।