नयाँ दिल्ली : भारतीय प्रधानमन्त्री नरेन्द्र मोदी बिहीबार दुई दिने जापान यात्रा लागि प्रस्थान गरेका छन्। प्रधानमन्त्रीको रूपमा यो उनको आठौँ जापान भ्रमण हो। यसअघि पूर्वप्रधानमन्त्री मनमोहन सिंहले तीन पटक मात्र जापान भ्रमण गरेका थिए।

मोदीले यसपटक १५औँ भारत–जापान वार्षिक शिखर सम्मेलनमा भाग लिनेछन्, जहाँ सुरक्षा, रक्षा, व्यापार र प्रविधि लगायतका विषयमा छलफल हुनेछ। सम्मेलनपछि मोदी र जापानी प्रधानमन्त्री फुमिओ इशिबा बिच डिनर कार्यक्रम पनि हुनेछ।

जापानी मिडियाका अनुसार यस यात्रामा जापानले भारतमा १० ट्रिलियन येन (करिब ५.९३ लाख करोड रुपैयाँ) लगानी गर्ने घोषणा गर्ने तयारी गरेको छ।

मोदीको जापान भ्रमणका प्रमुख एजेन्डामा १०० भन्दा बढी समझदारी पत्रमा हस्ताक्षर, आर्थिक सहयोगको नयाँ ढाँचा निर्माण, सेमीकन्डक्टर, कम्युनिकेशन, क्लीन एनर्जी र औषधि आपूर्ति सम्बन्धी सहकार्य र कृत्रिम बुद्धिमत्ता (एआई) सम्बन्धी नयाँ पहलको सुरुवात लगायत छन् ।

भारतले मुम्बई–अहमदाबाद बिच देशकै पहिलो हाइ–स्पीड रेल कोरिडोर निर्माण गरिरहेको छ। सन् २०१७ मा जापानका तत्कालीन प्रधानमन्त्री शिन्जो आबे र मोदीले संयुक्त रूपमा यसको शिलान्यास गरेका थिए। करिब १.०८ लाख करोड लागतको यो प्रोजेक्ट सम्पन्न भएपछि ५०८ किमीको दूरी करिब ३ घण्टामा पूरा हुनेछ।

जापानले भारतलाई E3 र E5 मोडलका दुई बुलेट ट्रेन उपहार दिने तयारी गरेको छ, जसको डेलिभरी २०२६ मा हुने अपेक्षा छ।

जापान हाल E10 (अल्फा X) मोडलमा काम गर्दैछ, जसको अधिकतम गति ४०० किमी/घण्टा हुने बताइएको छ। यो अत्याधुनिक मोडल भारत र जापान दुवै देशमा एकैसाथ परीक्षण गर्न सहमति भएको छ।

प्रधानमन्त्री मोदी शनिबार मियागी प्रान्तस्थित सेनदाई पुगेर यी नयाँ मोडलका कोच र सेमिकन्डक्टर उत्पादन गर्ने कारखाना अवलोकन गर्नेछन्।