• काठमाडौं : काठमाडौंमा बिहानैदेखि घाम लागेको छ । तर दिउँसोपख काठमाडौंसहित धेरै ठाउँमा ठूलो पानी पर्ने सम्भावना रहेको मौसम पूर्वानुमान महाशाखाले जनाएको छ ।

    मनसुनको न्यूनचापीय रेखा सरदर स्थानको आसपास रहेकाले केही ठाउँमा ठूलो पानी पर्ने सम्भावना रहेको मौसमविद् सरोज पुडासैनीले जानकारी दिए । अझै तीन दिन पानी पर्ने सम्भावना रहेको उनको भनाइ छ ।

    अहिले पनि बाग्मती र गण्डकी प्रदेशका केही ठाउँहरूमा तथा बाँकी प्रदेशका थोरै ठाउँहरूमा हल्कादेखि मध्यम वर्षा भइरहेको छ । गण्डकी र लुम्बिनी प्रदेशका एक–दुई ठाउँमा ठूलो पानी परिरहेको महाशाखाले जाएको छ ।

    गएराति ठूलो पानी परेपछि काठमाण्डौसहित विभिन्न ठाउँका नदी खोलाहरुमा बाढी आएको छ । बाग्मती र यसका सहायक नदीहरू हनुमन्ते, मनोहरा, धोवीखोला, विष्णुमती, नख्खु, बल्खुखोला लगायत नदी खोलामा बाढी आएको हो । नदी आसपासका कतिपय बस्तीमा बाढी पसेको छ ।

    यस्तै रुपन्देहीको तिनाउ, नवलपरासी र चितवनको नारायणी र सिन्धुपाल्चोकको कोशीमा अहिले नदीको सतहले खतराको तह पार गरेको बाढी पूर्वानुमान महाशाखाले जनाएको छ ।