काठमाडौं ।

सर्वोच्च अदालतले ०७४ असारदेखि चैतसम्म ८ हजार ३ सय २४ मुद्दा फर्छ्यौट गरेको जानकारी दिएको छ । आईतवारदेखि सुरु भएको नियमित पत्रकार भेटघाट कार्यक्रममा यो जानकारी दिईएको हो ।

पुरानो बाँकी रहेका १९ हजार ६ सय ५ र गत आर्थिक वर्षभित्र दर्ता भएका ६ हजार ७ सय ५६ मुद्दा गरी २७ हजार ९ सय २९ मुद्दामध्ये ८ हजार ३ सय २४ वटा फर्छ्यौट गरेको प्रवक्ता नारायणप्रसाद पन्थीले जानकारी दिए ।

यो कुल मुद्दाको २९.८ प्रतिशत हो । अघिल्ला वर्षहरुकै धेरै मुद्दा बाँकी रहेकाले फर्छ्यौट दर कम भएको उनले बताए । सर्वोच्चमा प्रवक्ताको जिम्मेवारी सम्हालिरहेका पन्थीले पत्रकारले आफ्नै स्टुडियोमा बसेर आफूसँग सर्वोच्चको सूचना पाउने सम्भावना नहुने बताए । ‘आफू स्टुडियोमा बसेर मसँग सूचना पाउने सम्भावना कम हुन्छ’ उनले भने ।

सूचना माग्दै आफूलाई जतिबेला पनि फोन आउने गरेको भन्दै पन्थीले राति ९ बजेसमेत फोन आएर हैरान हुने गरेको बताए । ‘एकजना साथीले राति ९ बजे फोन गर्नुभयो, म त्यस्तोबेलामा कहाँ हुन्छु ?’ उनले प्रश्न गरे ।