काठमाडौं : नबिल बैंक लिमिटेडका नवनियुक्त प्रमुख कार्यकारी अधिकृत (सीईओ) ज्ञानेन्द्रप्रसाद ढुंगानाले आज असार १७ गते शुक्रबारदेखि आफ्नो कार्यभार सम्हालेका छन्।

नबिल बैंककोे असार १६ गते सम्पन्न सञ्चालक समितिको बैठकले बैंकको सीईओमा ज्ञानेन्द्रप्रसाद ढुंगानालाई नियुक्त गरेको थियो। बैंकिङ क्षेत्रको व्यवस्थापन तह तथा नेतृत्वदायी भूमिकामा रही २५ वर्षभन्दा बढी लामो अनुभव सँगालेका ढुंगानाले यसभन्दा अगाडि नेपाल बंगलादेश बैंक लिमिटेडको सीईओका रुपमा १० वर्षसम्म नेतृत्व गरेका थिए। यसबाहेक उनले नेपाल क्रेडिट एन्ड कमर्स बैंकको महाप्रबन्धक तथा नेपाल राष्ट्र बैंकको निर्देशक पदमा समेत रही कार्य गरेका थिए।

भारतबाट चार्टर्ड एकाउन्टेन्सी (सीए) र अस्ट्रेलियाबाट सर्टिफिकेट पब्लिक एकाउन्टेन्ट (सीपीए) तथा वित्तीय विश्लेषणमा स्नातकोत्तरको अध्ययन पूरा गरेका ढुंगाना सन् २०१३ मा नेपाल व्यवस्थापन संघद्वारा ‘म्यानेजर टुव वाच’ र सन् २०१५ मा म्यानेजर अफ द इअर विधामा पुरस्कृत भएका थिए। कार्यकारी अधिकृत ढुंगाना सन् २०१८ मा नेपाल बैंकर्स एसोसिएसनको अध्यक्षमा चयन भएका थिए।

ढुंगानाको कुशल र सक्षम नेतृत्वमा आगामी दिनमा समेत नबिल बैंकले विभिन्न वित्तीय सूचकांकहरुमा अग्रणी स्थान हासिल गर्दै थप उचाइ प्राप्त गर्ने आशा गरिएको छ। ‘सीईओका रुपमा ढुंगानालाई हार्दिक स्वागत गर्दै बैंकले सफल कार्यकालको शुभकामना समेत व्यक्त गर्दछौँ’, बैंकद्वारा जारी विज्ञप्तिमा उल्लेख छ।