• कास्की : पोखरा महानगरपालिकाको मेयर पदमा गठबन्धनका तर्फबाट नेकपा एकीकृत समाजवादीका उम्मेदवार धनराज आचार्यको फराकिलो अग्रता कायमै छ ।

    आचार्य नेकपा एमालेका उम्मेदवार कृष्ण थापा भन्दा चार हजार चार सय ३६ मतले अगाडि छन् । अहिलेसम्म एक लाख ३० हजार सात सय २७ मतगणना हुँदा आचार्यले ५२ हजार नौ सय ७२ मत प्राप्त गरेका छन् भने थापाले ४८ हजार पाँच सय ३६ मत प्राप्त गरेका छन् ।

    यस्तै मेयरमा राप्रपाका उम्मेदवार शंकर खरालले पाँच हजार चार सय ६२ मत प्राप्त गरेका छन् । स्वतन्त्र उम्मेदवार गनेस पौडेललाई दुई हजार नौ सय १९ मत प्राप्त भएको छ ।

    पोखराको उपमेयरमा भने एमालेले अग्रता कामय गरेको छ । नेकपा एमालेकी उम्मेदवार मञ्जुदेवी गुरुङले ५५ हजार पाँच सय चार मत ल्याउँदा कांग्रेसकी उम्मेदवार कोपिला रानाभाटले ५१ हजार चार सय ८२ मत ल्याएकी छिन् । गुरुङ रानाभाट भन्दा चार हजार २२ मतले अघि छिन् ।