काठमाडौं ।

बिराट नगर महानगरका मेयर भीम पराजुलीले दरबन्दी बाहेकका पद सिर्जना गरी कर्मचारी नियुक्त गरेका छन् । १४ जना नियुक्त गर्नु पर्नेमा उनले २१ जनालाई नियुक्ति दिएका छन् । २१ जनामध्ये मेयर पराजुलीकी भान्जी रिजु पौडेल, महानगरका स्टोर शाखाका अधिकृत अशोक गुप्ताकी छोरी प्रतीक्षा गुप्ता र विराटनगरकै एक पत्रकारकी श्रीमती इन्दिरा पोखरेललाई पाँचौ तहको कर्मचारीमा नियुक्ति गरिएको छ। बिनाइजाजत नियुक्ति भएका कर्मचारी कामविहीन छन्।
स्वास्थ्य मन्त्रालय अन्तर्गत स्वास्थ्य सेवा विभागले १० जना कर्मचारी नियुक्ति गर्न भनी पठाएको पत्रलाई बेवास्ता गर्दै महानगरले २१ जना कर्मचारी नियुक्ति गरेको रहस्य बाहिरिएको हो । उपमेयर इन्दिरा कार्कीका अनुसार १४ जना नियुक्त गर्न पत्र पठाएको भन्दै मेयरले २१ जनाका लागि निर्णय गराएका हुन् ।