काठमाण्डौ : पछिल्लो समय लगातार ओरालो लाग्दै आएको शेयर बजार आज आइतवार भने उच्च अङ्कले बढेको छ । शेयर बजार परिसूचक नेप्से आज ९५ दशमलव ४६ अङ्कले बढेर दुई हजार चार सय २० दशमलव ९१ विन्दुमा पुगेको छ ।

सबै समूहको शेयर बढेको दिन बीमा, जलविद्युत्, फाइनान्स, विकास बैंक र माइक्रोफाइनान्स समूहको शेयर उच्च अङ्कले बढेको हो ।

आज कारोबार रकममा पनि सुधार आएको छ । दुई सय ३८ वटा कम्पनीका ६६ लाख ३९ हजार कित्ता शेयर दुई अर्ब ५३ करोड १२ लाख रुपैयाँमा कारोबार भएका छन् । सबैभन्दा धेरै सानिमा बैंकको प्रमोटर शेयर २२ करोड रुपैयाँमा किनबेच भयो ।

आज बेस्ट फाइनान्स, नेशनल हाइड्रोपावर लगायतका १२ वटा कम्पनीको शेयर १० प्रतिशतले बढेर सकारात्मक सर्किट लागेको छ । आज जम्मा चार वटा कम्पनीको शेयर मात्रै घटेको छ ।

स्थानीय तहको चुनावको मनोनयनको पहिलो दिनमै नेप्से बढ्न थालेसँगै यस्लाई चुनावी माहौलसँग हेरिएको छ । सिरानीमा राखेको भनिएको पैसा समेत चुनावमा खर्च भएर बजारमा आएसँगै तरलतामा सहजता आउने भएकोले सकरात्मक भएको विश्लेषण भएको छ । त्यस्तै शेयरबजार धेरैनै घटेपछि अव बढ्छ भन्ने विश्वास लगानीकर्तामा भएकोले शेयरबजारमा सकरात्मक माहौल देखिएको हो ।