काठमाडौं । सर्वोच्च अदालतको संवैधानिक इजलासमा डेढ महिनादेखि चलेको प्रतिनिधिसभा विघटनसम्बन्धी मुद्दाको बहस असार २१ सोमबार सकिएको छ । बहस सकिएसँगै इजलासले सो मुद्दा हेर्नका लागि २८ असारका लागि पेसी तोकिएको छ । उक्त दिन फैसला पनि आउन सक्ने सम्भावना छ ।

राष्ट्रपति विद्यादेवी भण्डारीले ७ जेठमा संविधानको धारा ७६ को उपधारा ५ अनुसार प्रधानमन्त्रीका लागि दाबी पर्न आएको नेकपा एमालेका अध्यक्ष केपी शर्मा ओली र नेपाली कांग्रेस सभापति शेरबहादुर देउवाको निवेदन खारेज गरि सोही राति प्रधानमन्त्री केपी शर्मा ओलीको सिफारिसमा  जेठ ८ गते विघटन गर्दै मध्यावधि निर्वाचनको मिति घोषणा गरेकी थिइन् । राष्ट्रपतिको यो कदमका विरुद्ध सर्वोच्चमा ३० वटा रिट परेका थिए । यी रिटमध्ये नेपाली काँग्रेसका सभापति शेरबहादुर देउवासहित १ सय ४६ जनाको हस्ताक्षरसहित सर्वोच्चमा परेको रिट निवेदनलाई मुख्य मानेर सर्वोच्चले संवैधानिक इजलासमा सुनुवाइ गरिरहेको थियो ।