काठमाडौं : राष्ट्रिय स्वतन्त्र पार्टी (रास्वपा) का सभापति रवि लामिछानेले विगतका राजनीतिक दलका अनुभवबाट सिकेर पार्टीभित्र गुट–उपगुटको राजनीति अन्त्य गरेर अघि बढ्नुपर्ने बताएका छन् ।

रास्वपाको प्रथम राष्ट्रिय महाधिवेशनको उद्घाटन सत्रलाई आज चितवनको भरतपुरमा सम्बोधन गर्दै सभापति लामिछानेले पार्टी एकताबद्ध भएर अघि बढे रास्वपालाई चुनौती दिने शक्ति अबको युगमा नआउने दाबी गरेका हुन्। उनले पार्टीभित्र त्याग र बलिदानको विषयमा असमान बुझाइ हुन सक्ने भन्दै त्यसप्रति सचेत रहन आग्रह गरे ।

उनले भने, ‘हामीले गुट उपगुटतिर नलागेर, विगतका राजनीतिक दलका अनुभवहरूलाई हेरेर अगाडि बढ्ने हो भने रास्वपालाई लडाउने शक्ति अबको युगमा कोही पनि आउन सक्दैन । तर कहिलेकाँही त्याग र बलिदान भनेको अरूले गर्‍यो भने खुशी मान्ने तर आफूले गर्‍यो भने दुःख मान्ने कुरा हुने रहेछ । यसबाट सचेत रहनका लागि म अनुरोध गर्न चाहन्छु ।’

सभापति लामिछानेले पुराना राजनीतिक दलहरू नेपाली कांग्रेस र नेकपा (एमाले) लाई पार्टीभित्र देखिएका विवादहरू सुल्झाउन सुभाव दिनुभयो । कांग्रेस र एमालेभित्रका समस्या नमिल्दा देशलाई अगाडि लैजान समस्या हुने उनको भनाइ छ ।

लामिछानेले चुनावअघि नै आफूले प्रधानमन्त्री शाहलाई सरकारको नेतृत्व गर्ने जिम्मेवारी दिइसकेको बताउँदै नागरिकका समस्या समाधान गरेर देश बनाउने जिम्मेवारी पनि उनकै भएको पनि बताए ।