काठमाडौं : ललितपुर महानगरपालिकाले चक्रपथ क्षेत्रलाई स्मार्ट स्ट्रिट लाइटमार्फत उज्यालो बनाउने अभियान तीव्र पारेको छ । ‘उज्यालो महानगरपालिका’ योजनाअन्तर्गत बालकुमारी पुलदेखि बल्खुसम्मको ७.९ किलोमिटर सडकमा आधुनिक बत्ती जडान गर्ने काम भइरहेको मेयर चिरिवावु महर्जनले जानकारी दिए ।

उनका अनुसार भित्री र बाहिरी सडकको काम सकेर नेपाल विद्युत प्राधिकरणसँगको सहकार्यमा चक्रपथमा काम भइरहेको हो । १३ करोड रुपैयाँ लागतको यस आयोजनामा महानगरले १० करोड र प्राधिकरणले ३ करोड रुपैयाँ लगानी गरेका छन् ।

रात्रिकालीन दुर्घटना र अवाञ्छित गतिविधि घटाउने उद्देश्यले विभिन्न उचाइका ७ सय ९० पोल र विभिन्न क्षमताका झन्डै दुई हजार बत्ती जडान गरिनेछ । बालकुमारीदेखि सातदोबाटोसम्मको काम सकिइसकेको छ, बाँकी काम अबको ३ महिनाभित्र सक्ने लक्ष्य छ ।