काठमाडौं : नेकपा एमालेले व्यवसायी मीनबहादुर गुरुङको जग्गा फिर्ता गर्ने प्रस्ताव गरेको छ । आज बसेको सचिवालय बैठकमा अध्यक्ष केपी शर्मा ओलीले गुरुङले दिएका १० रोपनी १४ आना जग्गा र शिलान्याससमेत गरिएको घर निर्माण प्रस्तावलाई धन्यवादसहित फिर्ता गर्ने कार्यसूची पेश गरेका हुन् ।

२०८१ सालको असोजमा गुरुङले एमालेलाई जग्गा दान दिँदै घर बनाइदिने बताएका थिए जसले पार्टीमा ठूलो विवाद सिर्जना गरेको थियो ।

अब एमालेले बल्खुमा रहेको आफ्नै जग्गामा भवन बनाउने तयारी थालेको छ र नयाँ भवन नबनुञ्जेल भाडामा घर खोज्ने प्रस्ताव पनि बैठकमा राखिएको छ । २०७२ साल वैशाखको भूकम्पले एमाले मुख्यालय भत्काएपछि पार्टी भाडाकै घरमा बस्दै आएको छ ।

यसैबीच एमालेले केन्द्रीय सदस्यहरूलाई महत्त्वपूर्ण जिम्मेवारी दिने तयारी गरेको छ । भोलिको सचिवालय बैठकबाट पारित हुने प्रस्तावअनुसार प्रदीप ज्ञवालीलाई विदेश मामिला विभाग, भानुभक्त ढकाललाई सङ्गठन विभाग, विशाल भट्टराईलाई जनसङ्गठन समन्वय संयन्त्र र शेरबहादुर तामाङलाई स्कूल विभागको जिम्मेवारी दिने प्रस्ताव छ ।

यस्तै क्षितिज थेबेलाई राष्ट्रिय युवा सङ्घको इन्चार्ज, रश्मी आचार्यलाई अनेरास्ववियुको इन्चार्ज, निरज आचार्यलाई निर्वाचन विभाग प्रमुख र सूर्य पाठकलाई प्रचार विभाग प्रमुखको जिम्मेवारी दिने प्रस्ताव रहेको छ ।