काठमाडौं : भारतले चिनी निर्यातमा प्रतिबन्ध लगाउने निर्णय गरेपछि त्यसको सम्भावित असरबारे नेपालमा चर्चा हुन थालेको छ । भारतको वाणिज्य विभागले हिजो सूचना निकालेर चिनी निर्यातमा प्रतिबन्ध लगाइएको जनाएको हो ।

सूचना अनुसार भारतले तत्काल लागू हुने गरी चिनीको निर्यातमा प्रतिबन्ध लगाएको छ । योसँगै नेपाली उपभोक्ताहरूले यही मौकामा बजारमा चिनीको अभाव हुन सक्ने चिन्ता व्यक्त गरेका छन् । तर नेपाली चिनी उत्पादकहरू भने यो निर्णयबाट खासै असर नपर्ने बताउँछन् ।

आयात नभए पनि कम्तीमा आउँदो मङ्सिर–पुससम्म चिनीको आपूर्तिमा कुनै असर नपर्ने नेपाली चिनी उद्योग सङ्घका अध्यक्ष शशिकान्त अग्रवालले बताउनुभयो । उहाँका अनुसार यसपालि क्रसिङ सिजनमा नेपालमा २ लाख मेट्रिक टन उत्पादन भएको छ भने सरकारी तथ्याङ्कअनुसार नै ७५ हजारदेखि ८० हजार मेट्रिक टन आयात भइसकेको छ ।

नेपालमा चिनीको मूल्यवृद्धि अरू खाद्यवस्तुको मूल्यवृद्धिको तुलनामा एकदमै कम हुने गरेको अध्यक्ष अग्रवालको भनाइ छ ।

दशैँ र तिहारजस्ता चाडपर्वका बेला नेपालमा चिनीको मूल्यवृद्धि र कृत्रिम अभाव देखिने गुनासो आए पनि अरू बेला त्यस्तो समस्या हुँदैन ।

प्रशोधित चिनी हालेको खानेकुरा धेरै खाँदा शरीरलाई हानी पुर्‍याउने भएकोले यसको प्रयोग घटाउन स्वास्थ्यकर्मीहरू सल्लाह दिन्छन् ।