काठमाडौं : नेपालले आफ्नो नक्सामा समावेश गरेको लिपुलेक भञ्ज्याङ हुँदै भारतले कैलाश मानसरोवर यात्रा खुला गरेको छ ।

चीन सरकारको समन्वयमा भारतको विदेश मन्त्रालयले सन् २०२६ का लागि कैलाश मानसरोवर यात्राको औपचारिक घोषणा गर्दै आवेदन खुला गरेको हो । कैलाश मानसरोवर यात्रा आउँदो जुनदेखि अगस्टसम्म सञ्चालन हुनेछ ।

यस वर्ष यात्राका लागि २० वटा समूह हुने भारतीय विदेश मन्त्रालयले हिजो निकालेको विज्ञप्तिमा उल्लेख छ । यसमध्ये १० वटा समूह उत्तराखण्ड हुँदै लिपुलेक भञ्ज्याङबाट र १० वटा समूह सिक्किम हुँदै नाथु ला भञ्ज्याङ भएर यात्रा गर्नेछन् । हरेक समूहमा ५० जना यात्रु रहने मन्त्रालयले जनाएको छ ।

यात्रामा सहभागी हुन चाहनेहरूले आधिकारिक वेबसाइटमार्फत अनलाइन आवेदन दिन सक्नेछन् । आवेदन दिने अन्तिम मिति मे १९ तोकिएको छ ।

धार्मिक तथा सांस्कृतिक दृष्टिले महत्त्वपूर्ण मानिने कैलाश मानसरोवर यात्रामा वर्षेनि ठूलो सङ्ख्यामा श्रद्धालु सहभागी हुने गर्छन् ।

लिपुलेक भञ्ज्याङ नेपालको पश्चिमी सीमा लिम्पियाधुराबाट ५६ किलोमिटरभित्रको भूमि हो । स्थानीयवासीले पुलाङ–गुञ्जी भन्ने लिपुलेक भञ्ज्याङ कालापानी क्षेत्रमा रहेको तीन वटा गाउँमध्ये एक हो । अहिले भारतीय नियन्त्रणमा रहेको यो क्षेत्रमाथि नेपालले निरन्तर आफ्नो दाबी प्रस्तुत गर्दै आएको छ ।

यसअघि सन् २०१५ र २०२० मा पनि नेपालले लिपुलेकको विषयमा भारत र चीनले गरेको द्विपक्षीय सम्झौताको विरोध गरेको थियो ।

नेपालले आफ्नो आधिकारिक नक्सामा महाकाली नदीपूर्वको लिम्पियाधुरा, लिपुलेक र कालापानीलाई समेटेको छ ।