काठमाडौं : देशका धेरैजसो ठाउँमा हावाहुरीसहित मध्यमदेखि ठूलो वर्षा भइरहेको छ । काठमाडौं उपत्यकामा पनि बेलुकी ५ बजेदेखि नै हावाहुरीसहित वर्षा भइरहेको छ ।

जल तथा मौसम पूर्वानुमान महाशाखाका अनुसार बागमती र गण्डकीका केही ठाउँ तथा कोशी, मधेश, लुम्बिनी र कर्णाली प्रदेशका थोरै ठाउँमा मेघगर्जन, चट्याङ र हावाहुरीसहित मध्यम वर्षा भइरहेको छ ।

पानी पार्ने प्रणाली पूर्वतर्फ सर्ने क्रममा रहेकाले र नयाँ प्रणाली विकास भइरहेकाले थप वर्षा, चट्याङ र हावाहुरीको सम्भावना रहेको मौसमविद् सञ्जीव अधिकारीले बताएका छन् ।

अहिले सुदूरपश्चिमको अछामसहित कर्णाली प्रदेशका हुम्ला, कालीकोट, रुकुम पश्चिम र जाजरकोटमा वर्षा भइरहेको छ । त्यस्तै लुम्बिनी प्रदेशदेखि पूर्वतर्फका धेरैजसो जिल्लाहरू—प्यूठान, गुल्मी, पर्वत, रुपन्देही, नवलपरासी, बागलुङ, म्याग्दी, कास्की, मनाङ, लमजुङ, गोरखा, तनहुँ, चितवन, नुवाकोट, मकवानपुर, सिन्धुपाल्चोक, दोलखा, सोलुखुम्बु, सङ्खुवासभा र ताप्लेजुङ—मा हल्कादेखि मध्यम वर्षा भइरहेको छ ।

यसैबीच सुदूरपश्चिमका कञ्चनपुर, डडेलधुरा र डोटी, लुम्बिनीका बर्दिया, बाँके, दाङ, अर्घाखाँची र नवलपरासी, गण्डकीको नवलपुर, बागमतीको चितवन, मधेशका बारा, पर्सा र धनुषा तथा कोशीका झापा र मोरङसहित आसपासका क्षेत्रमा भोलिसम्म नै तीव्र हावाहुरी कायम रहने मौसम पूर्वानुमान महाशाखाले जनाएको छ ।

अत्यावश्यक कामबाहेक बाहिर ननिस्कन मौसमविद्हरूले आग्रह गरेका छन् । साथै घरको झ्यालढोका मजबुत रूपमा बन्द गर्न र अग्ला रुख, बिजुलीका खम्बा तथा तारमुनि नबस्न महाशाखाको आग्रह छ ।

आज राति कोशी, मधेश, बागमती र गण्डकी प्रदेशका पहाडी भू–भागका केही ठाउँमा मेघगर्जनसहित ठूलो वर्षा र तराईका विभिन्न ठाउँमा तीव्र हावाहुरीको सम्भावना रहेकाले सतर्कता अपनाउन महाशाखाको आग्रह छ ।