काठमाडौं : सरकारले दुई वटा अध्यादेश जारी गर्न राष्ट्रपति रामचन्द्र पौडेलसमक्ष सिफारिस गरेको छ । हिजो बसेको मन्त्रिपरिषद् बैठकले राष्ट्रपतिसमक्ष सहकारी र संवैधानिक परिषद्सम्बन्धी दुई वटा अध्यादेश जारी गर्न सिफारिश गरेको हो ।

यसअघि वैशाख ८ गतेको मन्त्रिपरिषद् बैठकले संसद् अधिवेशन आह्वानका लागि राष्ट्रपतिसमक्ष सिफारिश गरेको थियो । सिफारिशअनुसार राष्ट्रपतिले वैशाख १७ गतेका लागि संसद् अधिवेशन आह्वान गर्नुभएको थियो । तर सरकारले फेरि वैशाख १० गते अधिवेशन स्थगित गर्न राष्ट्रपतिसमक्ष सिफारिश गरेको थियो । सरकारको सिफारिशअनुसार राष्ट्रपतिले अधिवेशन स्थगित गर्नुभएको थियो ।

सरकारले संवैधानिक परिषदमा नियुक्ति गर्न अध्यादेशका लागि राष्ट्रपतिलाई सिफारिश गरेको हो । संवैधानिक नियुक्तिका लागि सिफारिश गर्ने संवैधानिक परिषदमा प्रधानमन्त्री, सभामुख, राष्ट्रियसभाका अध्यक्ष, उपसभामुख, प्रधानन्यायधीश, विपक्षी दलका नेता गरी ६ जना सदस्य हुने व्यवस्था छ ।

हिजोमात्रै कांग्रेसले प्रतिनिधिसभामा दलको नेतामा भीष्मराज आङ्देम्बेलाई चयन गरेसँगै संवैधानिक परिषद्ले पूर्णता पाएको छ ।

यसैबीच संसद् छलेर अध्यादेश ल्याएको भन्दै प्रमुख प्रतिपक्षी दल नेपाली कांग्रेसले विरोध गरेको छ । कांग्रेस प्रवक्ता देवराज चालिसेले आज विज्ञप्ति निकालेर सरकार शक्ति केन्द्रीकरणतर्फ लागेको आरोप लगाएका छन् । उनले सदनमा स्पष्ट बहुमत हुँदाहुँदै बारम्बार अध्यादेशको बाटो रोज्नु शक्ति केन्द्रीकरणतर्फको खतरनाक सङ्केत रहेको उल्लेख गरे।