इरानले ‘स्ट्रेट अफ हर्मुज’ जलमार्गबाट थप जहाजहरूलाई अनुमति दिइरहेको तथ्याङ्कले देखाएको छ । इरानले हर्मुज जलमार्गबाट व्यावसायिक जहाजहरूलाई पार गर्न अनुमति दिइरहेको जहाज ट्र्याकिङ तथ्याङ्कलाई उद्धृत गर्दै समाचार संस्था अलजजीराले जनाएको छ ।

पछिल्ला दिनहरूमा हर्मज जलमार्गबाट आवतजावत गर्ने जहाजहरूको सङ्ख्या झन्डै दोब्बर भएको एक समुद्री गुप्तचर कम्पनीले जनाएको छ । समुद्री गुप्तचर कम्पनी विन्डवर्डका अनुसार जहाजहरूको स्वचालित पहिचान प्रणालीमार्फत सोमवार हर्मुज जलमार्गमा इरानका बाहेक आठ वटा जहाजपत्ता लागेको थियो ।

विन्डवर्डकी विश्लेषक मिशेल विस बोकम्यानले इरानले मित्र देशहरूलाई अनुमतिमा आधारित ट्रान्जिटअनुमति दिइरहेको सङ्केत गर्ने बताउनुभएको छ ।

अर्को जहाज ट्र्याकिङ सेवा ‘मरिनट्राफिक’ ले सोमवार र आइतवार नौ वटा जहाजको ट्रान्जिट रेकर्ड गरेको छ, यो सङ्ख्या अघिल्लो दुई दिनमा पाँच थियो ।

हर्मुजले विश्वव्यापी समुद्री तेल व्यापारको झन्डै २० प्रतिशत हिस्सा ओगटेको छ । तर अमेरिका–इजरायल र इरानबीचको युद्ध शुरू भएदेखि यहाँबाट हुने आपूर्तिमा ९५ प्रतिशतभन्दा धेरैले गिरावट आएको छ ।

यसैबीच विश्वकै महँगो तथा ठूलो युद्धपोत जेराल्ड आर फोर्डमा आगलागीपछि रेड सीबाट ग्रीसको टापु क्रेटेमा रहेको सोडा बन्दरगाहमा फर्कने भएको छ । यो युद्धपोतमा गएको बिहीवार आगलागी भएको थियो ।

यो युद्धपोत पछिल्ला नौ महिना विभिन्न महासागरमा तैनाथ थियो । जेराल्ड आर फोर्डमा ७५ भन्दा धेरै सैन्य विमान अट्छन् । यसमा ५ हजारभन्दा धेरै सैनिक चालक छन् ।