अमेरिकी राष्ट्रपति डोनाल्ड ट्रम्प प्रशासनले लगाएको कर वृद्धि (ट्यारिफ) र व्यापार तनावका बाबजुद पनि यस वर्षको पहिलो दुई महिनामा चीनको निर्यातमा उल्लेखनीय वृद्धि देखिएको छ।

जनवरी र फेब्रुअरीको आधिकारिक तथ्याङ्कअनुसार, चीनको निर्यात २० प्रतिशतभन्दा बढीले बढेको छ, जुन अर्थशास्त्रीहरूको अनुमानभन्दा झन्डै तीन गुणा बढी हो। यो वृद्धिले चीनलाई सन् २०२५ मा प्राप्त गरेको कीर्तिमानी वार्षिक व्यापार अधिशेषलाई पनि उछिन्न सक्ने बाटोमा ल्याएको छ।

यो महत्त्वपूर्ण घोषणा अमेरिकी राष्ट्रपति डोनाल्ड ट्रम्पले अप्रिलको सुरुमा आफ्ना चिनियाँ समकक्षी सी जिनपिङलाई भेट्न चीनको भ्रमण गर्ने तयारी भइरहेको बेला आएको हो।

विश्वको दोस्रो ठुलो अर्थतन्त्र चीन कमजोर उपभोक्ता खर्च, घट्दो जनसङ्ख्या र सम्पत्ति बजार संकट जस्ता धेरै आन्तरिक चुनौतीहरूको सामना गरिरहेको छ। यस्तो अवस्थामा निर्यातमा आएको यो उछालले चिनियाँ अर्थतन्त्रलाई टेवा दिएको छ।

बेइजिङले सामान्यतया जनवरी र फेब्रुअरीको व्यापार तथ्याङ्कलाई चन्द्र नयाँ वर्षको बिदाका कारण हुने मौसमी विकृतिहरू समायोजन गर्न एकैसाथ सार्वजनिक गर्छ। यस पटकको तथ्याङ्कअनुसार, इलेकट्रोनिक्सको बढ्दो मागसँगै चीनको निर्यातमा वृद्धि भएको छ भने कृषि तथा उत्पादित सामानको ढुवानीमा पनि बढोत्तरी भएको छ।

युरोपेली देशहरूसँगको चीनको व्यापार २७.८ प्रतिशतले बढेको छ। त्यस्तै, थाइल्यान्ड, सिंगापुर र फिलिपिन्सजस्ता दक्षिण पूर्वी एसियाली राष्ट्रहरूको समूह (आसियान) मा निर्यात करिब ३० प्रतिशतले वृद्धि भएको छ।

तर, ट्रम्पले दुई देशबिचको व्यापार असन्तुलनलाई सम्बोधन गर्न भन्सार शुल्क र अन्य उपायहरू लगाएपछि चीनको अमेरिकामा हुने निर्यातमा भने १० प्रतिशतभन्दा बढीले गिरावट आएको छ।

गत हप्ता, चीनले आफ्नो वार्षिक आर्थिक वृद्धि लक्ष्य ४.५ प्रतिशतदेखि ५ प्रतिशतसम्म राखेको थियो। यो सन् २०२५ मा निर्यातको बलमा हासिल गरिएको ५ प्रतिशतको लक्ष्यभन्दा केही कम हो। यसले कमजोर घरेलु खर्च र सम्पत्ति बजारको मन्दीका बाबजुद निर्यातले नै चिनियाँ अर्थतन्त्रलाई धानिरहेको देखाउँछ।

ट्रम्प र सी बिचको यो भेटवार्ता यस्तो समयमा हुँदै छ। जब चीनसहित एसियाका धेरै देशहरू इरानसँगको अमेरिका-इजरायल युद्धको आर्थिक प्रभावको सामना गरिरहेका छन्, जसले विश्वव्यापी ऊर्जा बजारलाई अस्तव्यस्त बनाएको छ। –ओसमन्ड चिया, व्यापार रिपोर्टर (बिबिसी)