-
चीनको सरकारी स्वामित्वमा रहेको विमान निर्माता कम्पनी कोम्याकले अमेरिकी बोइङ र युरोपेली एअरबसलाई चुनौती दिन थालेको छ । दुई वर्षअघि ‘सी–नाइन–वान–नाइन’ विमानले सिङ्गापुर उडान गरेसँगै चीनबाहिरको बजारमा कोम्याकको उपस्थिति विस्तार हुँदै गएको बीबीसीले जनाएको छ ।
किफायती विमानको माग बढिरहेको दक्षिण–पूर्वी एशियामा कोम्याकका विमानले एअरलाइन्सहरूको ध्यान तानेका छन् । एअरबसको ‘ए–थ्री–टु–जेरो–निओ’ र बोइङको ‘सेभेन–थ्री–सेभेन म्याक्स’ सँग प्रतिस्पर्धा गर्ने गरी विमान डिजाइन गरेको कम्पनीले जनाएको छ ।
विश्लेषकहरूका अनुसार विमान डेलिभरी ढिलाइ र आपूर्ति शृङ्खलाको समस्याका कारण यस क्षेत्रमा अर्को विमान निर्माताको आवश्यकता बढेको छ । अन्तर्राष्ट्रिय हवाई यातायात सङ्घका अनुसार पुराना विमान चलाउनुपर्दा एअरलाइन्सहरूको सञ्चालन लागत बढिरहेको छ । यही कारणले कोम्याक एशिया–प्रशान्तका धेरै एअरलाइन्सका लागि विकल्पका रूपमा उदाइरहेको छ ।
कम्पनीले अहिलेसम्म दुई सयभन्दा बढी विमान डेलिभर गरिसकेको जनाएको छ जसमा लाओस, इन्डोनेशिया र भियतनामका एयरलाइन्सहरू पनि समावेश छन् । ब्रुनाई र कम्बोडियाले पनि कोम्याकका विमान खरिद गर्ने योजना बनाइरहेका छन् ।
