अमेरिकामा हिउँदे आँधी कारण जनजीवन ठप्प भएको छ । हिजोदेखि शुरू भएको आँधीले हजारौँ उडान रद्द भएको, सडकहरूमा जमेको बरफले यातायात सेवा रोकिएको र विद्युत् आपूर्ति प्रभावित भएको समाचार संस्था एपीले जनाएको छ ।

मौसमविद् एलिसन सान्तोरेलीले हिउँ र बरफ पग्लन ढिलो हुने र यसले उद्धार कार्यलाई कठिन बनाउने बताएका छन् ।

हिउँदे आँधीका कारण कम्तीमा १२ वटा राज्यका आपत्काल घोषणा भएको छ । सङ्घीय आपत्कालीन व्यवस्थापन एजेन्सीले विभिन्न राज्यमा आपत्कालीन सामग्री, कर्मचारी र खोज तथा उद्धार टोलीहरू तयारी अवस्थामा राखेको छ ।

बरफ र हिउँले प्रभावित क्षेत्रहरूमा १ लाख ४० हजारभन्दा धेरै घरधुरीमा बिजुली आपूर्ति बन्द भएको खबरमा उल्लेख छ ।

हिजो र आज गरि अमेरिकाभर १३ हजारभन्दा धेरै उडान रद्द भएका छन् । डलास–फोर्ट वर्थ अन्तर्राष्ट्रिय विमानस्थलमा मात्रै ७ सयभन्दा धेरै उडान रद्द भएका छन् ।

न्यासभिल, लुइसियाना, डलास, ह्युस्टन, फीलाडेल्फिया र मेम्फिसमा विद्यालय बन्द गरिएका छन् ।