अमेरिकी राष्ट्रपति डोनाल्ड ट्रम्पले युरोपेली देशहरूमाथि लगाउने घोषणा गरेको भन्सार शुल्क तत्कालका लागि स्थगित भएको घोषणा गरेका छन् । यो निर्णय नाटोका महासचिव मार्क रुटेसँग भएको भेटवार्तापछि आएको हो ।

राष्ट्रपति ट्रम्पले सामाजिक सञ्जाल ट्रुथ सोसलमा लेख्दै यो सहमति कार्यान्वयनमा आएमा अमेरिकाका लागि मात्र नभई सम्पूर्ण नाटो सदस्य देशहरूका लागि लाभदायक हुने बताएका छन् । यद्यपि यस विषयमा नाटो महासचिव रुटेबाट औपचारिक पुष्टि आउन बाँकी रहेको बीबीसीले जनाएको छ ।

यसअघि ट्रम्पले स्वीट्जरल्यान्डको डाभोसमा आयोजित विश्व आर्थिक मञ्चलाई सम्बोधन गर्दै ग्रिनल्याण्ड अमेरिकाको राष्ट्रिय सुरक्षाका लागि अत्यन्तै महत्त्वपूर्ण रहेको दाबी गरेका थिए । डेनमार्कका विदेशमन्त्री लार्स लोके रासमुसेनले नाटोसँगको वार्ता अत्यन्त सकारात्मक भएको उल्लेख गर्दै अमेरिकाको सुरक्षा चासोलाई डेनमार्कले सम्मान गर्ने र समाधान खोज्न तयार रहेको बताएका छन् ।

ट्रम्पका अनुसार सम्भावित सम्झौता दीर्घकालीन हुनेछ र यसमा दुर्लभ खनिज स्रोत तथा मिसाइल रक्षा प्रणालीसम्बन्धी विषयहरू पनि समावेश हुन सक्नेछन् । ग्रिनल्याण्डमा दुर्लभ खनिजको ठूलो भण्डार रहेको छ, जुन मोबाइल फोन र विद्युतीय गाडी निर्माणमा प्रयोग हुने भएकाले यसको रणनीतिक महत्त्व बढ्दै गएको छ ।

यसअघि राष्ट्रपति ट्रम्पले बेलायत, डेनमार्क, फ्रान्स, जर्मनीलगायत नाटो सदस्य देशहरूबाट आयात हुने सबै सामानमा आउँदो फेब्रुअरीदेखि १० प्रतिशत र जुनदेखि २५ प्रतिशत भन्सार कर लगाउने चेतावनी दिएका छन्।

नाटोकी प्रवक्ता एलिसन हार्टले आर्कटिक क्षेत्रमा डेनमार्क, ग्रिनल्याण्ड र अमेरिकाबीच रूस र चीनको प्रभाव रोक्ने उद्देश्यले वार्ता अघि बढ्ने प्रतिक्रिया दिएको खबरमा उल्लेख छ ।