-
वासिङ्टन डिसी : भेनेजुएलाका राष्ट्रपति निकोलस मादुरो अमेरिकी हिरासतमा परेपछि अब त्यहाँ थप सैन्य कारबाहीको आवश्यकता नरहेको अमेरिकी विदेशमन्त्री मार्को रुबियोले स्पष्ट पारेका छन्।
रिपब्लिकन सिनेटर माइक लीले विदेशमन्त्री रुबियोसँगको टेलिफोन संवादपछि यस कुराको पुष्टि गरेका हुन्। मादुरो अहिले अमेरिकी सुरक्षा निकायको नियन्त्रणमा आइसकेकाले भेनेजुएलामा अब अरू कुनै सैन्य एक्सन नहुने रुबियोको प्रक्षेपण रहेको लीले बताएका छन्।
सिनेटर लीका अनुसार भेनेजुएलामा गरिएका अमेरिकी हवाई हमलाहरू राष्ट्रपति मादुरोविरुद्ध जारी गरिएको गिरफ्तारी पुर्जी कार्यान्वयन गर्ने टोलीको सुरक्षा र बचाउका लागि मात्र केन्द्रित थिए।
मादुरोलाई पक्राउ गर्ने अपरेशनमा खटिएका अधिकारीहरूलाई सुरक्षा प्रदान गर्न ती रणनीतिक प्रहारहरू गरिएको दाबी अमेरिकाले गरेको छ।
यद्यपि, सिनेटर लीले यसअघि सामाजिक सञ्जाल एक्समा एक पोस्ट गर्दै युद्धको घोषणा वा सैन्य बल प्रयोगको औपचारिक अनुमतिविना गरिएको यो कारबाहीको संवैधानिक वैधतामाथि प्रश्न उठाएका थिए।
उनले बिना कुनै कानुनी अधिकार गरिएको यस सैन्य कदमलाई कुन आधारले उचित ठहर्याउँछ भन्नेबारे थप स्पष्टता खोज्ने बताएका छन्। अहिले मादुरोलाई कहाँ र कुन अवस्थामा राखिएको छ भन्नेबारे विस्तृत विवरण सार्वजनिक हुन बाँकी छ।
