काठमाडौं : राष्ट्र बैंकका गभर्नर विश्वनाथ पौडेलले बैंकहरूले ‘कर्जा प्याकेज’ हरू पुनरावलोकन गर्नुपर्ने बताएका छन् ।

नेपाल आर्थिक पत्रकार समाज (सेजन) को २९औं वार्षिक साधारणसभामा बोल्दै गभर्नर पौडेलले विभिन्न क्षेत्रहरूबाट बैंकहरूको कर्जाका बारेमा प्रश्न उठेको बताउँदै अब बैंकहरूले त्यस्ता प्याकेजहरू पुनरावलोकन गर्ने बेला आएको बताए ।

गभर्नर पौडेलका अनुसार उद्योगी, व्यवसायीहरूसँग छलफल गरेर बैंकका प्रमुख कार्यकारी अधिकृत (सीईओ) हरूले त्यस्ता प्याकेजहरू डिजाइन गर्नुपर्छ । अहिलेका प्याकेजहरू डिजाइनमा कमजोरी हुँदा प्रभावकारी रूपमा ऋण प्रवाह हुन नसकेको र व्यापक रूपमा बैंकमा पैसा थ्रुपिएको उनको भनाइ छ ।

यस्तै कार्यक्रममा नेपाल उद्योग वाणिज्य महासङ्घका अध्यक्ष चन्द्रप्रसाद ढकालले नेपालमा केही हुँदैन भन्ने भाष्य सिर्जना गर्न खोजिएको बताउँदै त्यसलाई चिर्न जरुरी रहेको बताएका छन् । उनले नेपालकै पूँजीले पनि धेरै ठूला आयोजना बनाउन सकिने बताए ।

नेपालमा ठूला पूर्वाधार बनाउनका लागि नेपाल डेभलपमेन्ट पब्लिक (एनडीपी) बनाइएको उनको भनाइ छ । अध्यक्ष ढकालका अनुसार त्यसमा धेरै व्यवसायी समेटेर नेपालकै पूँजी परिचालन गरेर ४०–५० अर्बका परियोजना बनाउन थालिएको छ । ढकालले नेपालमै लगानीको वातावरण रहेको सन्देश दिनका लागि पनि एनडीपीको योजनालाई अघि बढाइएको बताए ।

अध्यक्ष ढकालले आमव्यवसायीसँगै नागरिकको मनोबल उकास्ने गरी अब सरकारले काम गर्न जरुरी रहेको उल्लेख गरे ।