अमेरिकी विदेशमन्त्री मार्को रुबियो नेतृत्वको उच्चस्तरीय अमेरिकी टोली र युक्रेनी प्रतिनिधिमण्डलबीच हिजो जेनेभामा भएको वार्ताले युक्रेनमा शान्ति स्थापना सम्बन्धी २८ बुँदे योजनामा केही प्रगति भएको निष्कर्ष निकालेको छ । तर सुरक्षा ग्यारेन्टीका मुख्य मुद्दाहरूमा भने सहमति जुट्न नसकेको समाचार संस्था रोयटर्सले जनाएको छ ।

राष्ट्रपति डोनाल्ड ट्रम्पले तयार गरेको शान्ति योजनाले युक्रेनलाई केही भूभाग त्याग्न, सेनाको आकारमा सीमितता स्वीकार्न र नाटोमा सम्मिलित नहुन आग्रह गरेको छ । जसले युक्रेन र युरोपेली देशहरूबीच चिन्ता बढाएको छ । रुबियोले वार्तामा केही जटिल बुँदाहरू सल्टाउन गर्न सफल भएको तर नाटोको भूमिकादेखि युक्रेनलाई दिने सुरक्षा प्रत्याभूतिको विषय अझै टुंगिन बाँकी रहेको बताए ।

यसैबीच, युक्रेनका राष्ट्रपति भोलोदिमिर जेलेन्स्कीले भूभाग सम्बन्धी संवेदनशील विषयमा प्रत्यक्ष छलफल गर्न अमेरिका आउने सम्भावनाबारे दुवै पक्षबीच कुराकानी भइरहेको बताए । युक्रेनको ऊर्जा संरचनामा तीव्र आक्रमण भईरहेको र सैनिक अभाव बढिरहेको अवस्थामा यो विषय युक्रेनका लागि अत्यन्तै संवेदनशील मानिएको छ ।

युक्रेनी राष्ट्रपति घरेलु राजनीतिक दबाब, भ्रष्टाचार काण्ड र युद्ध–स्रोत अभावबीच कसरी आफ्नो स्वाधीनता र प्रतिष्ठाको रक्षा गर्ने भन्ने चुनौतीसँग जुधिरहेका छन् । युद्धको झन्डै चार वर्ष पूरा हुँदै गर्दा युक्रेन अझै पनि अमेरिकी सैन्य सहयोग र सूचनामा निर्भर छ ।