अमेरिकाले विश्वको सबभन्दा ठूलो युद्धपोत क्यारेवियन सागरमा परिचालन गरेपछि भेनेजुएलाका राष्ट्रपति निकोलस मदुरोले अमेरिका ‘युद्ध निम्त्याउन’ उद्यत रहेको आरोप लगाएका छन् । अमेरिकी रक्षामन्त्री पिट हेग्सेथले यूएसएस जेराल्ड आर फोर्ड युद्धपोतलाई भूमध्यसागरबाट क्यारेवियनमा खटिन हिजो आदेश दिएका थिए।

यो युद्धपोतले ९० वटा विमान बोक्न सक्छ । केही समययता अमेरिकाले क्यारेवियन क्षेत्रमा उसको सैन्य उपस्थिति बाक्लो बनाउँदै लगेको छ । लागुऔषध तस्करलाई निसाना बनाउने अभियानका लागि त्यसो गरिएको अमेरिकाले बताएको छ । तर मदुरोले सरकारी सञ्चारमाध्यमलाई बताए अनुसार अमेरिकाले नयाँ युद्ध निर्माण गर्न खोजिरहेको छ ।

बीबीसीका अनुसार क्यारेवियन क्षेत्रमा युद्धपोत, परमाणु क्षमतायुक्त पनडुब्बी तथा एफ–३५ जस्ता लडाकू विमान खटाइएका छन् । लागुऔषध तस्कर केन्द्रित पछिल्लो आक्रमणमा ६ जना पुरुष मारिएको अमेरिकी रक्षामन्त्री हेग्सेथले दाबी समेत गरेका छन् ।

यो कारबाही क्यारेवियन सागरमा रहेको एक जहाजमाथि गरिएको र त्यो जहाज ट्रेन डे आराग्वा नामक भेनेजुएलाली अन्तर्राष्ट्रिय आपराधिक सङ्गठनको रहेको हेग्सेथले बताएका छन् । मदुरो लामो समयदेखि ट्रम्पको विरोधीकारुपमा मानिन्छन् ।

अमेरिकी राष्ट्रपति डोनाल्ड ट्रम्पले मदुरो लागुऔषध तस्करी गर्ने सङ्गठनका नाइके भएको आरोप लगाएका छन् । मदुरोले ती आरोपलाई अस्वीकार गरेका छन् । ट्रम्पले भेनेजुएलाभित्र रहेका कोकिन उत्पादन केन्द्रहरू तथा लागुऔषध ओसारपसारका मार्गहरूलाई निसाना बनाउनेबारे सोचविचार गरिरहेको अमेरिकी सञ्चारमाध्यम सीएनएनले जनाएको छ । ट्रम्पले यसबारे अन्तिम निर्णय लिन बाँकी रहेको रिपोर्टमा उल्लेख छ ।