काठमाडौं : यस वर्षको भाईटीकाको उत्तम कार्तिक ६ गते बिहिबार बिहान ११ः ३९ बजे रहेको नेपाल पञ्चांङ्ग निर्णायक विकास समितिका अध्यक्ष प्रा. शम्भुप्रसाद ढकालले जानकारी दिएका छन् । कार्तिक ६ गते बिहिबार मध्यान्नकालमा टीका लगाउन बाधा नपरे पनि साईत खोज्नेका लागि धनु लग्न, कन्या नवमांश, चर बेला र अभिजित् योग तथा विजय मुहूर्तको शूभ साईत दिएको समितिका सदस्य प्रा. देवमणि भट्राईले बताएका छन् ।

यसवर्ष यमपञ्चक कार्तिक १ गते शनिवारदेखि सुरु भएको थियो । यस्तै कार्तिक ४ गते दिउँसो ०४ः२९ बजेसम्म औँशी तिथि रहेको थियो। त्यस्तै आज गाई, गोरु र आत्म (म्ह)पूजा भने कात्तिक ५ गते बुधबार गर्नुपर्ने शास्त्रीय वचन रहेको छ ।

यसै दिन यस वर्ष नेपाल संवत् अनुसार नयाँ वर्ष मनाउनुपर्ने समितिले जनाएको छ। प्रतिपदाका दिन सूर्योदय भएकै दिन नयाँ वर्ष मनाउनुपर्ने शास्त्रीय वचन अनुसार यस्तो निर्णय गरिएको छ। यसै दिनदेखि नेपाल संवत् ११४६ सुरु हुन्छ।