-
प्यालेस्टिनी विद्रोही समूह हमासले निःशस्त्रीकरण गर्न र सबै बन्धकहरूलाई रिहा गर्न सहमत नभए गाजा शहर ध्वस्त हुने इजरायलका रक्षामन्त्रीले चेतावनी दिएका छन् ।
व्यापक अन्तर्राष्ट्रिय र घरेलु विरोधका बाबजुद इजरायली मन्त्रिपरिषद्ले गाजा शहरमा ठूलो आक्रमणको योजनालाई अनुमोदन गरेपछि रक्षामन्त्री इजरायल काट्जको यो टिप्पणी आएको बीबीसीले जनाएको छ ।
गएको सोमवार हमासले कतार र इजिप्टका मध्यस्थकर्ताहरूको ६० दिने युद्धविरामको प्रस्तावमा सहमति जनाएको थियो । सहमति अनुसार गाजामा बाँकी रहेका आधा बन्धकहरूलाई रिहा गरिनेछ ।
तर इजरायली प्रधानमन्त्री बेन्जामिन नेतान्याहुले यो प्रस्तावलाई अस्वीकार गर्दै बाँकी रहेका सबै बन्धकहरूको रिहाइ र गाजामा युद्ध अन्त्य गर्न ‘इजरायललाई स्वीकार्य’ शर्तहरूमा वार्ता शुरू गर्न निर्देशन दिएका छन् ।
२२ महिनाको युद्धपछि ५० बन्धकमध्ये २० जनामात्र जीवित रहेका इजरायलको विश्वास छ । ठाउँ निर्धारण भएपछि वार्ताकारहरूलाई पुनः वार्ताका लागि पठाइने एक इजरायली अधिकारीलाई उद्धृत गर्दै खबरमा उल्लेख छ ।
गएराति इजरायलमा रहेको गाजा डिभिजनको मुख्यालयको भ्रमणको क्रममा एक भिडियो वक्तव्यमा नेतान्याहुले आफू गाजा शहर नियन्त्रणमा लिने र हमासलाई पराजित गर्ने इजरायली रक्षा बल (आईडीएफ) को योजनालाई अनुमोदन गर्न आएको बताएका थिए ।
