इन्डोनेशियाले गाजाका दुई हजार जना घाइतेको उपचार गर्ने बताएको छ ।

इन्डोनेशियाले घाइतेहरूको उपचारका लागि रक्षा र विदेश मन्त्रालयसँगको समन्वयमा सिङ्गापुरको दक्षिणमा रहेको गलाङ टापुमा एउटा चिकित्सा सुविधा स्थापना गरिने बताएको बीबीसीले जनाएको छ । घाइतेहरू कसरी इन्डोनेशिया पुग्छन् भन्नेबारेमा अहिलेसम्म जानकारी प्राप्त भएको छैन ।

यसअघि संयुक्त राष्ट्रसङ्घले भियतनामी शरणार्थीहरूलाई गलाङ टापुमा राखेको थियो र कोभिड–१९ महामारीको समयमा बिरामीहरूको उपचार गर्न त्यहाँ एउटा अस्पताल स्थापना गरेको थियो ।

यो कुनै स्थानान्तरण नभई केवल उपचारको उद्देश्यका लागि रहेको इन्डोनेशियाका राष्ट्रपतिका प्रवक्ताले बताएका खबरमा उल्लेख छ । प्रवक्ताका अनुसार घाइतेहरू निको भएपछि र हेरचाह पूरा भएपछि गाजा फर्कने छन् ।

इन्डोनेशियाका राष्ट्रपति प्रबोवो सुबियान्तोले गएको अप्रिलमा झन्डै एक हजार जना गाजावासीलाई आश्रय दिन तयार रहेको बताउनुभएको थियो ।