अमेरिकी राष्ट्रपति डोनाल्ड ट्रम्पको धम्कीका बाबजुद भारतले रुसबाट तेल खरिद गरिरहने सङ्केत गरेको छ । भारतीय विदेश मन्त्रालयले रुससँगको आफ्नो सम्बन्ध ‘स्थिर र समयद्वारा परीक्षित’ भएको र यसलाई तेस्रो देशको चश्माबाट हेर्नु नहुने बताएको समाचार एजेन्सी एपीले जनाएको छ ।

साप्ताहिक पत्रकार सम्मेलनलाई सम्बोधन गर्दै विदेश मन्त्रालयका प्रवक्ता रणधीर जयसवालले बजारमा तेलको उपलब्धता र विद्यमान विश्वव्यापी परिस्थितिबाट आफ्नो ऊर्जा आवश्यकता सुरक्षित गर्न भारतको व्यापक दृष्टिकोण निर्देशित भएको बताए ।

रुसी तेल खरिद गरेका कारण भारतीय सामानमा २५ प्रतिशत भन्सार शुल्क र थप आयात कर लगाउने अमेरिकी राष्ट्रपति ट्रम्पको घोषणापछि भारतको यो टिप्पणी आएको हो ।

भारतले सन् २०२२ जनवरीमा रुसबाट प्रतिदिन ६८ हजार ब्यारेल कच्चा तेल खरिद गरेको थियो तर त्यही वर्षको जुनमा तेल आयात प्रतिदिन ११ लाख २० हजार ब्यारेल पुगेको थियो । यस्तै सन् २०२३ को मे मा दैनिक आयात २१ लाख ५० हजार ब्यारेल पुगेको थियो ।

प्रेस ट्रस्ट अफ इन्डियाले डाटा एनालिटिक्स कम्पनी केप्लरको तथ्याङ्क उद्धृत गर्दै रिपोर्ट गरेअनुसार रुसी तेल आपूर्ति एक समयमा भारतको आयातको झन्डै ४० प्रतिशतसम्म पुगेको थियो । यसले रुसलाई भारतको सबैभन्दा ठूलो कच्चा तेल आपूर्तिकर्ता बनाएको थियो ।

भारतको दैनिक तेल खपत झन्डै ५५ लाख ब्यारेल रहेको छ र त्यसमध्ये झन्डै ८८ प्रतिशत आयातबाट पूरा हुन्छ ।

चीन र अमेरिकापछि विश्वको तेस्रो ठूलो कच्चा तेल आयातकर्ता भारतले पश्चिमी देशहरूले मस्कोलाई सजाय दिन त्यसलाई बहिष्कार गरेपछि छुटमा उपलब्ध रुसी तेल किन्न थालेको हो ।