सुडानमा चलिरहेको द्वन्द्वका कारण विस्थापित भएका १३ लाखभन्दा धेरै नागरिक अहिले पुनः आफ्नै घर फर्किएको संयुक्त राष्ट्रसङ्घले जनाएको छ । उनीहरूको पुनर्थापना र पुनर्निर्माणका लागि राष्ट्रसङ्घले अन्तर्राष्ट्रिय समुदायलाई आवश्यक सहयोगको अपिल समेत गरेको अन्तर्राष्ट्रिय समाचार संस्था एएफपीले जनाएको छ ।

संयुक्त राष्ट्रसङ्घअन्तर्गत आप्रवासन, शरणार्थी तथा विकाससम्बन्धी निकायहरूले संयुक्त रूपमा वक्तव्य निकालेर अहिलेसम्म १० लाखभन्दा धेरै आन्तरिक रूपमा विस्थापित व्यक्ति सुडानभित्रै आफ्ना घर फर्किएको र थप झन्डै तीन लाख २० हजार व्यक्ति छिमेकी देश इजिप्ट र दक्षिण सुडानबाट स्वदेश फर्किएको जानकारी दिएका छन् ।

अहिले केही ठाउँहरुमा द्वन्द्वको प्रभाव कम भए पनि समग्र अवस्था अझै पनि अति संवेदनशील रहेको राष्ट्रसङ्घले उल्लेख गरेको छ । सन् २०२३ को अप्रिलदेखि सेना प्रमुख अब्देल फत्ताह अल बुर्हान र अर्धसैनिक समूहका कमाण्डर मोहम्मद हम्दान डाग्लोबीचको सत्ता सङ्घर्षले सुडानलाई गम्भीर मानवीय सङ्कटमा पारेको छ । द्वन्द्वका कारण हजारौँ नागरिकले ज्यान गुमाएका छन् भने लाखौँ विस्थापित भएका छन् ।