-
अमेरिका र चीनबीच व्यापारसम्बन्धी सम्झौता हस्ताक्षर भएको छ । अमेरिकी राष्ट्रपति डोनाल्ड ट्रम्पले अमेरिका र चीनले व्यापार सम्झौतामा हस्ताक्षर गरेको बताउनुभएको समाचार संस्था एपीले जनाएको छ ।
अमेरिकी वाणिज्य सचिव हावर्ड लुटनिकले ब्लूमबर्ग टिभीलाई बताएअनुसार यस हप्ताको शुरूमा हस्ताक्षर भएको थियो । लुटनिक र ट्रम्प दुवैले सम्झौताको बारेमा कुनै विवरण दिनुभएको छैन ।
लुटनिकले यो सम्झौतामा दुई दिनअघि ‘हस्ताक्षर र छाप लगाइएको’ बताउनुभएको छ । अमेरिकाले यो सम्झौताले चीनबाट दुर्लभ पृथ्वीको निर्यातलाई तीव्र बनाउने उल्लेख गरेको छ ।
चीनले पनि अमेरिकासँग भएको व्यापार सम्झौताको पुष्टि गरेको छ । चीनले अमेरिकाले प्रतिबन्धात्मक उपायहरू हटाउने र आफूले निर्यात नियन्त्रणअन्तर्गतका वस्तुहरूको समीक्षा र अनुमोदन गर्ने बताएको छ ।
गएको मे महिनाको शुरूमा स्विट्जरल्यान्डको जेनेभामा भएको प्रारम्भिक वार्ताको परिणाम स्वरूप यो सम्झौता भएको खबरमा उल्लेख छ । वार्ताले दुवै पक्षलाई ठूला भन्सार शुल्क वृद्धि स्थगित गर्न प्रेरित गरेको थियो ।
भन्सार शुल्क वृद्धिले दुई देशबीचको धेरैजसो व्यापार स्थगित हुने खतरा थियो । पछि बेलायतमा भएको वार्ताले सम्झौताका लागि रूपरेखा तय गरेको र सम्झौतालाई औपचारिक रूप दिएको देखिन्छ ।
चीनले अप्रिलमा सात दुर्लभ खनिज तत्त्वमा अनुमति आवश्यकताहरू लगाएपछि दुई देशबीचको व्यापार युद्ध झनै चर्किएको थियो । खनिजको निर्यात नियन्त्रणले अमेरिका र विश्वभरका कार, रोबोटलगायतका अन्य उच्च प्रविधिका उत्पादनहरूको उत्पादनमा बाधा पुग्ने खतरा बढेको थियो ।
ट्रम्प र अन्य अमेरिकी अधिकारीहरूले भारतलगायत अन्य धेरै देशसँग व्यापारिक सम्झौतामा पुग्ने अपेक्षा गरेको सङ्केत पनि दिएका छन् ।
