काठमाडौं ।

अरु सचिव भन्दा बिशेष जिम्मेवारी वहन गर्नपर्ने गृहमन्त्रालयमा अहिले गृहकै क्याडर सचिव बनेका छन् । नेपाल सरकार कार्यविभाजन नियमावली २०७४ का अनुसार अन्य मन्त्रालयको कार्यविभाजनमा नपरेका विषयसमेत हेर्ने गरी गृह मन्त्रालयका विभिन्न ५१ वटा महत्वपूर्ण जिम्मेवारी रहेका छन् । त्यसकारण पनि यो पदमा बिशेष तालिम प्राप्त व्यक्ति आवश्यक पर्दछ । यस अघि प्राय यो मापदण्ड लागू गरिएको थिएन ।

अहिले मन्त्रीपरिषद्ले गृहसचिव वनाएका गोकर्णमणि दुवाडी गृहकै ‘क्याडर’ हुन् । उनी बिभिन्न जिल्लामा प्रमुख जिल्ला अधिकारी भएर काम गरेका ब्यक्ति हुन् । सिन्धुपाल्चोक, सप्तरी जस्ता पहाड र तराईका जिल्लामा प्रमुख जिल्ला अधिकारीको रुपमा उनले काम गरेका छन् । मधेश प्रदेशमा पनि उनले मुख्यसचिव भएर काम गरेका थिए ।

गृहसचिव वनेर नतिजा दिनका लागि केही बाञ्छित योग्यता भए अझ राम्रो हुने जानकारहरु बताउँछन् । शक्तिकेन्द्रका हानाथापले गर्दा गृहकै क्याडर गृहसचिव बन्ने गरेको देखिदैन । गृहकै क्याडर गृहसचिव बनाउने हो भने केही सहज हुने एक पूर्वगृहसचिवले बताए ।

हक्की स्वभाव र चाकडी चाप्लुसीमा नलाग्ने दुवाडीले भूमि ब्यवस्था बिभागमा रहँदा अनलाईन प्रणालीमा काम गरेर सुशासनको पक्षमा काम गरेका थिए । उनको यो कामको प्रशंसा भएको थियो । चीनमा बिशेष सुरक्षा तालिम (डिफेन्स कोर्ष तालिम) लिएका दुवाडीले जापान बाट पब्लिक पोलिसीमा मास्टर डिग्री गरेका छन् ।