काठमाडौं : नेपाल आयल निगमले इन्धनको मूल्यमा भारी कटौती गरेको छ । सोमबार बसेको निगम सञ्चालक समिति बैठकले डिजेल, मटीतेल र हवाई इन्धनको मूल्य लिटरमा १०/१० रुपैयाँले र पेट्रोलको मूल्य लिटरमा ३ रुपैयाँले घटाउने निर्णय गरेको हो । खाना पकाउने ग्याँसको मूल्य भने हाललाई यथावत राखिएको छ ।

निगमको उक्त निर्णयसँगै अब डिजेल र मटीतेलको खुद्रा मूल्य प्रतिलिटर १६५ रुपैयाँ कायम भएको छ । यसअघि डिजेल र मटीतेलको खुद्रा मूल्य १७५ रुपैयाँ लिटर थियो । यस्तै हवाई इन्धन आन्तरिक र बाह्यतर्फ पनि औसत लिटरमा १० रुपैयाँले मूल्य घटेको छ ।

यस्तै पेट्रोलको मूल्य लिटरमा ३ रुपैयाँले घटाएर १७५ रुपैयाँ कायम गरिएको छ । खाना पकाउने ग्याँसको मूल्य भने प्रतिसिलिण्डर १८ सय रुपैयाँमै याथावत राखिएको छ ।

पछिल्लो समय भारतबाट मूल्य घटेर आउँदै गर्दा निगमले मूल्य घटाउन आनकानी गर्ने गरेको बताईँदै आएतापनि यसपटक भने निगमले पेट्रोलिम पदार्थको मूल्यमा भारी कटौती गर्न बाध्य भएको छ । इन्धनको उच्च मूल्यका कारण भएको मूल्यबृद्धिले अर्थतन्त्रका अवयवहरु नै शिथिल बन्न थालेपछि भरखर मात्रै मन्त्रिपरिषद विस्तार गरेर सुधारको काम थाल्ने बताउँदै आएको प्रचण्ड नेतृत्वको सरकारले नै दवाव दिएर निगमले मूल्य घटाउन बाध्य भएको जानकारहरुको भनाई छ ।