काठमाडौं : आउँदो आइतवार हुने प्रदेश सभा र प्रतिनिधि सभाको चुनावका लागि काठमाडौंबाट बाहिरिनेको सङ्ख्या बढ्न थालेको छ ।

कतिपय, बस रिजर्भमा लिएर काठमाडौंबाट आफ्नो गाउँ घर जाँदै छन् । पार्टीका सम्पर्क समन्वय समिति र उम्मेदवारबाट बस रिजर्भ भएका हुन्। आफैँ टिकट काटेर जानेको सङ्ख्या पनि बढेको छ । महानगरीय ट्राफिक प्रहरी महाशाखाका अनुसार हिजो सार्वजनिक गाडीमार्फत् नै विभिन्न नाका भएर ५५ हजारभन्दा धेरै यात्रु काठमाडौंबाट बाहिरिएका छन् ।

यो समयमा साढे ४१ हजार यात्रु काठमाडौं भित्रिएका छन् । काठमाडौं छाड्नेको सङ्ख्या भोलिदेखि अझ बढ्ने अनुमान छ । भोलिदेखि ५ गतेसम्म मतदानस्थल रहेका शिक्षण संस्थाहरू बन्द हुनेछन् । यस्तै, सरकारी कार्यालय र सार्वजनिक निकायहरु ४ र ५ गते बन्द हुने छन् ।

बिदासँगै भोलि शुक्रवार पनि परेकाले धेरैजसो भोलि र पर्सि गाउँ घर जानेछन् । चुनावका लागि झण्डै पाँच लाख यात्रु काठमाडौंबाट बाहिरिने नेपाल यातायात व्यवसायी राष्ट्रिय महासङ्घको अनुमान छ । निर्वाचन आयोगले भोट हाल्ने दिन मङ्सिर ४ गते अत्यावश्यकबाहेकका सार्वजनिक गाडी चलाउन नपाइने जानकारी गराइसकेको छ ।