• कास्की : गण्डकी प्रदेशको अर्थ तथा विकास समितिमा आज बिहीवार सभापतिबाहेक सांसद र मन्त्रीहरू नआएपछि बैठक स्थगित भएको छ । समितिका सभापति दीपक कोइरालाले बोलाएको बैठकमा समितिका कुनै पनि सदस्य सहभागी नभएका हुन् ।

    समितिमा ६ जना मन्त्री, ६ जना एमालेका सांसद र दुई जना माओवादी सांसद छन् । दिउँसो १ बजेका लागि डाकिएको बैठकमा २ बजेसम्म कोही पनि नआएपछि बैठक स्थगित गरिएको सभापति कोइरालाले बताए ।

    सरकारले गएको असार १ गते बजेट ल्याएपछि बजेटमाथि छलफल हुन सकेको छैनन् । त्यही भएर संसद्को गतिरोधबारे छलफल गर्नका लागि बैठक बोलाएको कोइरालाले बताउनुभयो । समितिले संसद् नचल्नुका कारण खोज्न र छिटो सदन सञ्चालनका लागि निर्देशन दिन अर्थ मन्त्रीलाई समेत डाकेको उनको भनाइ छ ।

    यता एमालेले सदनमा गर्नुपर्ने बजेट छलफल संसदीय समितिमा गर्न लागिएको भन्दै हिजो बुधवार पत्रकार सम्मेलन गरेर विरोध गरेको थियो ।